У нядзелю 10 лістапада ў Вільні прайшла акцыя памяці Рамана Бандарэнкі, забітага ў Менску чатыры гады таму. У мерапрыемстве ўзяла ўдзел Святлана Ціханоўская.
Беларуская лідарка выступіла на акцыі з прамовай.
«"Я выходжу!" – такімі былі апошнія словы Рамана Бандарэнкі. Ён выйшаў, каб абараніць нашыя сімвалы. Каб спыніць гвалт дыктатуры. Каб мы з вамі маглі жыць у свабоднай краіне. Раману быў усяго 31 год. Ён ахвяраваў сваё маладое жыццё для нас з вамі. Ён стаў беларускім героем, як і шмат якія іншыя беларусы. Іхныя ахвяры не былі дарэмнымі. Пакуль гвалт дыктатуры не спынены, мы з вамі будзем працягваць выходзіць!», – сказала Ціханоўская.
Лідарка беларускіх дэмакратычных сілаў падзякавала арганізацыі «Дапамога», якая штотыдзень ладзіць у Вільні акцыі салідарнасці.
,,«Пакуль у свеце ёсць неабыякавыя беларусы – барацьба працягваецца», – рэзюмавала Святлана Ціханоўская.
Раман Бандарэнка быў збіты на плошчы Пераменаў у Менску ўвечары 11 лістапада 2020 года. Ён выйшаў абараніць бела-чырвоныя стужкі ў двары, якія зразалі невядомыя. Рамана спачатку забралі ў Цэнтральны РАУС, а адтуль – у лякарню з чэрапна-мазгавой траўмай. 12 лістапада Раман памёр.
Марыя Міхалевіч belsat.eu
