Сёння ўначы тэрыторыю Расеі атакавалі БПЛА. У выніку зафіксавана некалькі пажараў. У той жа час Расея выпусціла вялікую колькасць «Шагэдаў» па тэрыторыі Украіны.
Сілы супрацьпаветранай абароны РФ знішчылі і перахапілі 23 беспілотнікі, выпушчаныя па Падмаскоўі і іншых гарадах Расеі, паведамляла расейскае Мінабароны. Агулам ужо налічылі 32 збітых БПЛА. Інфармацыя абнаўляецца.
Паводле паведамленняў мэра Масквы Сяргея Сабяніна, беспілотнікі збівалі ў Раменскай гарадской акрузе. Жыхары Раменскага паведамляюць пра гукі выбухаў. Пра выбухі паведамляецца ў гарадскіх акругах Дамадзедава і Каломна.
Улады часова спынілі працу па прыёме і адпраўцы авіярэйсаў у аэрапартах «Дамадзедава», «Жукоўскі».
Паведамляецца пра пашкоджанне прыватных дамоў у выніку падзення абломкаў у вёсцы Станавае Раменскага раёны ў Падмаскоўі.
Акрамя таго, ёсць паведамленні пра імавернае траплянне на 1060-ы цэнтр матэрыяльна-тэхнічнага забеспячэння Узброеных сілаў РФ.
Паведамленняў пра пацярпелых пакуль няма.
У той жа час расейскія БПЛА атакавалі тэрыторыі Украіны. У прыватнасці, 15 дронаў было збіта над Кіеўскай вобласцю.
Таксама «Шагэды» атакавалі Адэскую вобласць. У самой Адэсе было траплянне па мясцовым рынку.
Агулам паведамляецца пра больш як 40 БПЛА ў паветранай прасторы Украіны.
Раман Шавель belsat.eu
