Улады Расеі разглядаюць магчымасць аб’яднання нафтавых кампаніяў «Роснефть», «Газпром нефть» і «Лукойл» у адзіны нацыянальны холдынг.
Гэта дазволіць Расеі прадаваць нафту па больш выгадных цэнах, піша «Wall Street Journal» (WSJ). Перамовы паміж прадстаўнікамі ўраду і кіраўнікамі гэтых кампаніяў працягваюцца ўжо некалькі месяцаў, але пакуль няма гарантыі, што зліццё адбудзецца.
Адзін з планаў, якія цяпер абмяркоўваюцца, прадугледжвае, што «Роснефть» паглыне «Газпром нефть» і «Лукойл». Тым не менш некаторыя кіраўнікі гэтых кампаніяў выступаюць супраць аб’яднання.
У выпадку рэалізацыі гэтага плану новы холдынг зробіцца другім паводле велічыні вытворцам нафты ў свеце, саступаючы толькі саудаўскай кампаніі «Aramco», і будзе здабываць утрая больш сыравіны, чым амерыканская «ExxonMobil».
Аб’яднанне дазволіць Расеі ўмацаваць уплыў на энергетычныя рынкі і прадаваць нафту па больш высокіх цэнах для такіх краінаў, як Індыя і Кітай.
Таксама гэта можа палегчыць барацьбу з санкцыямі, бо аб’яднаная структура будзе мець магчымасць выкарыстоўваць дубайскае гандлёвае падраздзяленне «Лукойлу» Litasco. Паводле крыніцаў WSJ, план Пуціна прадугледжвае таксама прыцягненне энергетычнага сектару для падтрымання ваенных намаганняў.
Нагадаем, што адразу пасля перамогі Доналда Трампа на выбарах у ЗША расейскі мільярдэр Алег Дзерыпаска спрагназаваў, што гэтая падзея можа прывесці да зніжэння цаны на нафту да 50 долараў за барэль.
Пры гэтым на наступны дзень пасля выбараў у ЗША цана на нафту маркі «Brent» упала да 74 долараў за барэль, а маркі «WTI» яшчэ ніжэй – да 71 долара.
Продаж нафты разам з продажам газа ёсць адной з асноўных крыніцаў папаўнення расейскага бюджэту і наўпрост звязаны з магчымасцю РФ весці вайну ва Украіне.
Раман Шавель belsat.eu
