Унутранае расследаванне ў дачыненні пракурора Карыма Хана праз абвінавачанні ў сексуалізаваных дамаганнях правядзе Міжнародны крымінальны суд у Гаазе. Недатаваны і непадпісаны дакумент, што трапіў да журналістаў, прапануе яму адмовіцца ад сваёй пасады на час расследавання.
Пра гэта выданню «Reuters» паведамілі дзве крыніцы, знаёмыя з сітуацыяй. Паводле атрыманых звестак, у дамаганнях Карыма Хана абвінавацілі яшчэ ў кастрычніку, але ён аспрэчыў гэтыя абвінавачанні і папрасіў унутраны наглядальны орган суда расследаваць іх. Акрамя таго, ён указаў, што абвінавачанні супалі з кампаніяй дэзінфармацыі супраць ягонага офісу.
«Стужкі пра такія неправамерныя паводзіны не адпавядаюць рэчаіснасці. Я адпрацаваў у розных умовах 30 гадоў, і ніхто ніколі не падаваў на мяне падобных скаргаў», – заявіў Хан.
Нагадаем, у 2023 годзе Карым Хан выдаў ордар на арышт прэзідэнта Расеі Уладзіміра Пуціна і дзіцячай амбудсменкі ў Расеі Марыі Львовай-Бяловай праз падазрэнні ў незаконнай дэпартацыі дзяцей з Украіны.
Таксама Хан запатрабаваў выдаць ордар на арышт прэм'ер-міністра Ізраілю Бэньяміна Нэтаньягу, а сёлета ў верасні заявіў пра атрыманне ад Літвы матэрыялаў, датычных «трансгранічных злачынстваў супраць чалавечнасці, учыненых Аляксандрам Лукашэнкам і ягонымі прыхільнікамі», з просьбаю правесці расследаванне.
Тэса Анэйда belsat.eu
