У парламенце прыйшлі да высновы, што правядзенне выбараў недапушчальнае ва ўмовах, калі ў няволі тыя, хто збіраўся быць кандыдатам на мінулых выбарах.
Замежны камітэт Палаты дэпутатаў Парламенту Чэшскай Рэспублікі 7 лістапада прыняў рэзалюцыю «ў падтрыманне несправядліва зняволеных палітычных вязняў аўтарытарнага рэжыму Аляксандра Лукашэнкі ў Рэспубліцы Беларусь».
У рэзалюцыі Замежны камітэт заклікаў улады Беларусі неадкладна вызваліць лаўрэата Нобэлеўскай прэміі міру Алеся Бяляцкага і 1300 іншых палітвязняў, несправядліва пазбаўленых волі за мірную дзейнасць на карысць дэмакратыі і правоў чалавека ў сваёй краіне, а таксама спыніць палітычныя рэпрэсіі супраць дэмакратычна настроеных апанентаў Лукашэнкі.
Камітэт падкрэсліў: «Правядзенне прэзідэнцкіх выбараў, абвешчаных на 26 студзеня 2025 года ў Рэспубліцы Беларусь, у цяперашніх умовах, калі несправядліва застаюцца ў зняволенні кандыдаты з мінулых прэзідэнцкіх выбараў 9 жніўня 2020 года, недапушчальнае і вынікі гэтых выбараў нельга ўважаць легітымнымі».
Фармальна ўсе кандыдаты-2020 на волі: Святлана Ціханоўская ў выгнанні, а ў Беларусі Андрэй Дзмітрыеў (у красавіку ён выйшаў на волю пасля амаль 1,5 года за кратамі), Ганна Канапацкая (яна бярэ ўдзел у выбарах-2025), Сяргей Чэрачань і Аляксандр Лукашэнка. У няволі – Віктар Бабарыка і Сяргей Ціханоўскі, якія збіралі подпісы за вылучэнне кандыдатамі, але былі зняволеныя да рэгістрацыі кандыдатаў.
Дэмакратычныя сілы Беларусі заклікаюць байкатаваць выбары-2025 – актыўна ці пасіўна. Еўрапарламент ужо заявіў, што выбары ў Беларусі не могуць быць прызнанымі справядлівымі і свабоднымі.
Алесь Наваборскі belsat.eu
