Два паветраныя шары прынеслі на Падляшша амаль тры тысячы пачкаў цыгарэтаў без акцызных знакаў.
Ранкам 8 лістапада жыхар Кольна, што ў Падляскім ваяводстве Польшчы, паведаміў паліцыі пра паветраны шар з пакетам, што вісіць на віядуку пад горадам Ставіскі, расказвае «RMF24». Калі мужчына спрабаваў выцягнуць пакунак, паветраны шар лопнуў. Знаходку сумленны грамадзянін прынёс паліцыю. Пасля піратэхнічнага правярання паліцыянты ўскрылі пакунак і знайшлі каля 1500 тысячы пачкаў цыгарэтаў без акцызных знакаў.
Падобны паветраны шар знайшлі ў вёсцы Шацілоўка, што таксама ў Падляскім ваяводстве. Да яго быў прывязаны пакунак з 1350 пачкамі цыгарэтаў.
Паводле «RMF24», паветраныя шары – гэта метэазонды з Беларусі, што выкарыстоўвалі для кантрабанды. Паліцыя адзначае, што да паветраных шароў былі прымацаваныя прылады для геалакацыі.
Таксама паліцыя адзначае, што гэта не першае такое здарэнне: у ноч на 17 кастрычніка ў Сакольніках у тым жа ваяводстве знаходзілі падобны паветраны шар. Таксама пра паветраны аб’ект «з усходу» паведамлялі ў чэрвені.
Літоўскія службы ў верасні зарэгістравалі 250 паветраных шароў з кантрабанднымі цыгарэтамі, што ляцелі з Беларусі. Адзін упаў у віленскім аэрапорце, яшчэ адзін знайшлі ў цэнтры Вільні. У Літве шукаюць датычных да кантрабанды цыгарэтаў на метэазондах, затрымалі сем чалавек.
Алесь Наваборскі belsat.eu
