У Польшчы пройдзе суд над 26 асобамі, датычнымі да транспартавання нерэгулярных мігрантаў. Сярод падсудных – адзін беларус.
Справа будзе разглядацца ў акруговым судзе Любліна. Згодна з ёй, пракуратура польскага гораду Замасьць падазрае крымінальную групу ў спрыянні незаконнаму ўезду ў Еўразвяз больш чым 180 мігрантаў, паведамляе «MOST MEDIA».
Сярод абвінавачаных – пяць грамадзянаў Украіны і адзін беларус.
Згодна з інфармацыяй пракуратуры, група дзеяла з кастрычніка 2022 года і выкарыстоўвала як беларуска-польскую мяжу, так і балканскі маршрут. Удзельнікі мелі розныя ролі: адныя займаліся арганізацыяй, другія наймалі кіроўцаў, а трэція дастаўлялі мігрантаў з мяжы.
Удзельнікам выстаўленыя абвінавачванні ў кіраванні арганізаванай злачыннай групай і ў спрыянні нелегальнай міграцыі. Шэсць асобаў таксама абвінавачваюцца ў незаконным захоўванні наркотыкаў, якія былі знойдзеныя ў іх пры вобшуку.
Большасць абвінавачаных прызнала сваю віну. У Польшчы ўдзел у злачыннай групе караецца пазбаўленнем волі на тэрмін да пяці гадоў, арганізацыя незаконнага пераходу мяжы – да васьмі гадоў, а кіраўніцтва групай і захоўванне наркотыкаў – да дзесяці гадоў.
Раман Шавель belsat.eu
