Хаця з ліпеня ў Беларусі на волю па памілаванні выйшлі 146 чалавек, рэпрэсіі працягваюцца. Толькі за апошні тыдзень затрымана не менш 100 чалавек. Падрабязней пра гэта і іншыя рэпрэсіі ў штодзённым аглядзе «Белсату».
У Смаргоні і Слоніме «зачыстка» – затрымана не менш за 40 чалавек, паведамляе «Гарадзенская праваабарона». Таксама ідуць рэпрэсіі ў Лідзе.
«Нагоды для затрымання людзей самыя розныя: удзел у мірных акцыях яшчэ ў 2020 годзе, падпіскі на «экстрэмісцкія» сайты і тэлеграм-каналы, пастаўленыя подпісы ў 2020 годзе за кандыдатаў на выбарах, дапамога сем'ям палітвязняў, атрыманне дапамогі ад ініцыятыў. Затрымліваюць і тых, хто пастаянна жыве ў горадзе і тых, хто вяртаецца з-за мяжы», – пішуць праваабаронцы.
Супраць некаторых распачалі крымінальныя справы паводле артыкулаў 357 КК («Змова ці іншыя дзеянні, здзейсненыя з мэтай захопу дзяржаўнай улады») і 361 КК («Заклікі да санкцый ці іншых дзеянняў, якія шкодзяць нацыянальнай бяспецы»).
У Слоніме затрымана не менш дзесяці чалавек, у тым ліку вядомых людзей. Некаторым ужо прысуджаны адміністрацыйны арышт на 15 содняў, іншым пагражаюць крымінальнымі справамі.
Раней «зачысткі» адбываліся і ў іншых гарадах. Паводле інфармацыі Аб’яднанага пераходнага кабінету, у Беларусі толькі за апошні тыдзень затрымалі не менш за 100 чалавек.
Некаторым падчас «хапуноў» у Смаргоні і Слоніме казалі, што новая хваля «зачысткак» будзе студзені 2025 года. Праваабаронцы мяркуюць, што гэта звязана з прэзідэнцкімі выбарамі, якія пройдуць 26 студзеня.
Сілавікі сапраўды рыхтуюцца да выбараў – ветэранаў МУС задзейнічаюць у «электаральнай кампаніі па розных напрамках», заявіў міністр унутраных спраў Іван Кубракоў. Ён адзначыў, што ў ведамстве налічваецца 27 тысяч ветэранаў.
«Найперш у ахове грамадскага парадку на выбарчых участках. Аксакалы таксама стануць сябрамі камісій, назіральнікамі. І, калі трэба, устануць у баявыя парадкі і павядуць за сабой моладзь», – сказаў Кубракоў.
Не спыняецца і папаўненне Спіса экстрэмісцкіх матэрыялаў. У яго трапілі:
- Telegram-каналы і чаты «Євген Карась✙», «Гродно и область: полезные новости», «Hrodna 11:27», «Šufliadka» з лагатыпам, «Haradzienski harmidar» з лагатыпам;
- Instagram старонка «talk_mara»;
- YouTube-каналы «Беларуская мечта», «Быць Беларусам»;
- Старонкі ў TikTok «АДРЮХА2», «Макс», «Вольны беларус», «Władisław Andreew», «страник», «andrei_gaponik», «javier.from.belar», «zekme.bу», «tokbelarus», «phoenix_inform», «user5395510724747», «mediazona_by», «breezejo», «barbara_ronde», «madmax8117», «.278708», «extremist2180_2.0», «bel.rada.visiоn», «romanchuk_s», «belarus_mara», «lessprit», «umounyja», «vetvi.vlasti», «racyjabelarus», «zmahar6», «sapraudny_bielarus», «ekstrim_bel_tv», «narco_cartel.rf», «byaroza_media», «osuzhdaem», «volfanchik».
Арсен Рудэнка belsat.eu
