Мытня Літвы ўзмоцніць кантроль на мяжы з 11 лістапада. Гэта закране тавары, якія вывозяцца з ЕЗ і лічацца рызыкоўнымі, паведамляе прэс-служба літоўскай мытні.
У звязку з санкцыямі супраць Расеі і Беларусі на памежных пунктах будзе праводзіцца фізічны кантроль тавараў падвойнага прызначэння. Гэтыя тавары могуць выкарыстоўвацца ў баявых мэтах або для вытворчасці ваенных матэрыялаў. Асаблівая ўвага будзе нададзеная экспарту электронных тавараў, напрыклад, чыпаў, мікрасхемаў і іншых электронных кампанентаў.
«Таксама будзе больш жорсткім кантроль за таварамі, выключанымі з санкцыйнага рэжыму, такімі як медычнае дыягнастычнае абсталяванне, экспарт розных машынаў і іх частак і аналагічных тавараў, – адзначае мытня Літвы. – Такім чынам, літоўская мытня працягвае свае ініцыятывы для перадухілення экспарту тавараў у краіны-агрэсары».
Літоўская мытня на мяжы з Беларуссю і Расеяй адказвае за кантроль усяго экспарту з Еўразвязу, адпаведна, правярацца будуць не толькі літоўскія тавары, але і ўвесь экспарт з ЕЗ.
«Экспарт з іншых краінаў – чальцоў ЕЗ складае каля 90 % усіх тавараў, якія перасякаюць літоўскую мяжу», – заключае мытня Літвы.
Таксама глядзіце ў сюжэце:
Арсен Рудэнка belsat.eu
