Сёння ў Беларусі стартаваў збор подпісаў на падтрыманне кандыдатаў на прэзідэнта Беларусі, які цудоўным чынам супаў з Днём кастрычніцкай рэвалюцыі. Паглядзелі, як выглядае гэтае феерычнае свята, зарганізаванае ўладамі розных гарадоў.
Збор подпісаў будзе працягвацца да 6 снежня, пасля чаго іх перададуць у ЦВК для падліку, а з 22 да 31 снежня пройдзе рэгістрацыя кандыдатаў, якія набралі не менш за 100 тысяч подпісаў.
Да збору дапусцілі рэкордна мала ініцыятыўных групаў: толькі 7. На мінулых выбарах, у 2020 годзе, было 15, на пазамінулых, у 2015-м, – 8, а ў 2001-м – ажно 22. У 2010 годзе ў бюлетэні трапіла больш кандыдатаў, чымся цяпер хаця б дапусцілі да збору подпісаў.
Сёлета ўлады падрыхтаваліся да таго, каб на выбарах не было ніводнай нечаканасці, таму сярод кандыдатаў – толькі блізкія да цяперашніх улады людзі і няма нават ніякага напаміну пра апазіцыю. У дзяржаўных медыях усе рэпартажы былі прысвечаныя адзінаму кандыдату – Аляксандру Лукашэнку. Але пра астатніх вы можаце пачытаць тут.
Зрэшты, і самыя вынікі выбараў ніякіх сумневаў не выулікаюць, таму ўсё, што застаецца, – сачыць за гэтым святам камунізму дзеля антрапалагічнага вывучэння.
Вось так, напрыклад, сёння збіраюць подпісы за яго каля ракі Вяча ў Менскім раёне. Там зарганізавалі цэлы чэмпіянат калоння дроваў для СМІ, а галасы збіраюць у намёце з надпісам «Надо!».
«Цяпер гэта месца, дзе сабралася самая вялікая чарга ахвочых. Прымаюць подпісы чатыры пункты, але пры гэтым у кожнай стаіць чарга», – вядзе рэпартаж адтуль каманда праўладнага выдання, якая называецца «Батьковая правда».
Не менш весела праходзіць збор подпісаў за Лукашэнку на Гомельшчыне. Сёння ўвесь горад пылае камуністычнымі сцягамі, уперамежку з чырвона-зялёнымі. Тут людзей вывелі на «ўрачысты мітынг у гонар 7 лістапада», а потым – здаць подпісы.
«Традыцыя збірацца ў гэты дзень каля помніку Уладзіміру Ільічу Леніну даўняя і пры гэтым не губляе сваёй значнасці і яскравасці для гомельцаў. 107 гадоў таму свет змяніўся, даўшы пачатак новай, вялікай краіне, часткай якой мы працягваем заставацца калі не тэрытарыяльна, то сэрцам», – апісваюць гэты шлях «Гомельские ведомости».
У Гомлі на праспекце Перамогі пікеты разгарнулі прадстаўнікі праўладных аб’яднанняў – Рэспубліканскай партыі працы і справядлівасці, Камуністычнай партыі Беларусі, партыі «Белая Русь», Беларускага саюзу жанчын ды іншых.
«Гараджане актыўна падпісваюцца за кандыдатаў, вывучаюць інфармацыйныя стэнды з біяграфіямі. Святочны настрой ім стварыў патрыятычны флэш-моб», – апісвае newsgomel.by.
Жыхары Берасця таксама прынеслі кветкі да помнку Ільічу. Не абышлося без знамёнаў з подпісам «Слава КПСС», а потым самыя сумленныя берасцейцы пайшлі аддаваць свае подпісы патэнцыйным кандадатам на прэзідэнта.
Мяркуючы з фатаздымкаў з Магілёва, там таксама быў толькі пункт збору подпісаў за Лукашэнку з тым жа лозунгам «Надо!».
У Віцебску чыноўнікі кажуць, што людзей прыйшло шмат, бо «ёсць вялікая цікавасць да выбараў». Акрамя таго, тут пачалі збіраць подпісы не толькі на вуліцах, але і «спосабам кватэрнага абыходу»
Тэса Анэйда belsat.eu
