Міжнародныя камандна-штабныя вучэнні «Моцная воля 2024» пройдуць 6-20 лістапада «ў загадзя вызначаных вайсковых і грамадзянскіх раёнах Коўна і Паўднёва-Усходняй Літвы». Гэта значыць – недалека ад мяжы з Беларуссю.
«Асноўная мэта вучэнняў, якія арганізуюцца штабам камандавання Сухапутных войскаў Літвы, – адпрацоўка падрыхтоўкі падначаленых падраздзяленняў да планавання і правядзення буйнамаштабных абарончых аперацыяў, узаемадзеяння з хаўруснікамі NATO, інтэграцыі падраздзяленняў баявога забеспячэння і каардынацыі ўзаемных дзеянняў», – гаворыцца ў паведамленні прэс-служба Узброеных сілаў Літвы.
Адзначаецца, што ў вучэннях возьмуць удзел больш за 400 вайскоўцаў з баявой тэхнікай, якія будуць «планаваць і праводзіць абарончыя аперацыі, выкарыстоўваючы ваенную інфармацыйную сістэму баявога кіравання і кантролю».
Узброеныясілы Літвы папярэджваюць, што падчас правядзення вучэнняў на паўднёвым усходзе краіны, а менавіта там праходзіць мяжа з Беларуссю, магчыма «больш інтэнсіўнае перамяшчэнне вайсковай тэхнікі і транспартных сродкаў у светлы і цёмны час сутак».
Нагадаем, 5 лістапада начальнік Галоўнага ўпраўлення – намеснік начальніка Генеральнага штабу Узброеных Сілаў Беларусі Уладзімір Купрыянюк, заявіў, што «калектыўны Захад узмацняе прысутнасць на ўсходніх межах кааліцыйных войскаў», якія «здольныя наносіць высокадакладныя ўдары па аб'ектах на тэрыторыі Беларусі і заходніх рэгіёнах Расеі».
Раней, 18 верасня, начальнік Дэпартамента міжнароднага ваеннага супрацоўніцтва Міністэрства абароны Беларусі Валерый Равенка выказаў незадаволенасць тым, што прадстаўнікоў беларускага ваеннага ведамства не запрашаюць назіраць за заходнімі вучэннямі.
Надзея Вольная belsat.eu
