Беларускія ўлады заклапаціліся распаўсюджаннем радыкальных плыняў ісламу ў краіне, у першую чаргу – сярод студэнтаў.
Гэта вынікае з пратакола пасяджэння міжведамаснай працоўнай групы па ўдасканаленні дзяржаўнай палітыкі ў сферы нацыянальных адносінаў, створанай у сакавіку 2020 года.
Адпаведны дакумент трапіў у рукі арганізацыі былых сілавікоў «BELPOL», якая падзялілася ім з рэдакцыяй «Белсат».
На пасяджэнні рабочай групы, якое адбылося 26 верасня 2024 года, сярод іншага абмяркоўвалася пытанне процідзеяння распаўсюджванню радыкальных ісламскіх рухаў у Беларусі.
Па выніках абмеркавання Міністэрству адукацыі было рэкамендавана ўзмацніць кантроль над замежнымі студэнтамі з ісламскіх краін, каб не дапусціць «прапаганды скажоных трактовак ісламу і схілення навучэнскай моладзі ў яго радыкальныя плыні».
З гэтай мэтай адміністрацыям ВНУ і сярэдніх навучальных установаў, у якіх вучацца такія студэнты, даручана «неадкладна інфармаваць праваахоўныя органы пры выяўленні падобных фактаў».
Падчас пасяджэння таксама было падкрэслена, што Міністэрства ўнутраных спраў рэгулярна прымае меры па выяўленні і спыненні рэлігійна-экстрэмісцкай дзейнасці, у тым ліку асобаў, што прытрымліваюцца радыкальных напрамкаў ісламу.
Як патлумачыў прадстаўнік «BELPOL» Уладзімір Жыгар, у прынцыпе нічога незвычайнага ў гэтым няма.
«Сістэма, асабіста Лукашэнка могуць казаць на публіку ўсё што заўгодна, расказваць пра братэрскія сувязі, падтрымку, але тыя пагрозы, якія нясе ў сабе радыкальны іслам, добра вядомыя, у тым ліку і рэжыму», – адзначыў суразмоўца «Белсату».
Уладзімі Жыгар падкрэсліў, што на публіку пра гэтыя пагрозы казаць не хочуць, але меры рэагавання, натуральна, прымаюць.
,,«Асабліва сістэму цікавяць людзі, якія раней былі хрысціянамі, а зараз прынялі іслам, і якія цяпер пражываюць на тэрыторыі Рэспублікі Беларусь. У дачыненні да такіх людзей існуюць нават асобныя спісы. У такіх спісах была, напрыклад, прапагандыстка [Ксенія] Лебедзева, якая мяняла веру з хрысціянства на іслам», – адзначыў Уладзімір Жыгар.
Прадстаўнік «BELPOL» таксама падкрэсліў, што арганізаваны рэжымам Лукашэнкі міграцыйны крызіс таксама ўносіць свае карэктывы ў працу беларускіх уладаў, ўплывае на гэта і «павальнае запрашэнне замежнікаў для навучання ў беларускіх ВНУ».
Адметна, што яшчэ ў 2009 годзе адзначалася, што студэнты з азіяцкіх краінаў займаюць другое месца сярод усіх замежных студэнтаў у беларускіх ВНУ.
У студзені 2024 года Мінадукацыі падкрэслівала, што ў Беларусі вучацца 30 тысячаў студэнтаў. На першым месцы – прадстаўнікі КНР, а на другім – грамадзяне з такіх мусульманскіх краінаў, як Узбекістан і Туркменістан.
Пры гэтым кансультант упраўлення міжнароднага супрацоўніцтва Мінадукацыі Кацярына Мар’іна адзначыла, што ў краіне вучыцца «дастаткова вялікая колькасць навучэнцаў з краінаў Азіі».
Таксама падкрэслівалася, што ў Беларусь сталі прыязджаць на навучанне грамадзяне афрыканскіх краінаў і карыбскага рэгіёну.
Раман Шавель belsat.eu
