Нашая каляжанка, якая з прычынаў бяспекі не раскрывае свайго імя, была вымушаная экстрана эвакуявацца з Беларусі з адным заплечнікам пасля ператрусу, допыту і новага выкліку да следчых.
Журналістка «Белсату» распачала збор на платформе «BYSOL»: просіць агулам € 3000: паўтары тысячы на арэнду жытла на тры месяцы, тысячу – на 25 заняткаў сына з дэфектолагам, паўтысячы – на самае неабходнае на першы час.
Гэтая журналістка не раскрывае свайго імя, бо ў Беларусі засталіся блізкія ёй людзі пад крымінальным пераследам. Але яна раскрывае, што да 2022 года яна рабіла перадачу «Маю права», а з 2022 года – «Ваяры». Увесь гэты час я працавала з Беларусі, паралельна з працай адпраўляла бандэролі зняволеным у ізалятары, падтрымлівала сваякоў палітвязняў.
«З'яжджаць з Беларусі я не планавала, імкнулася стаць нябачнай: выдаліла акаўнты з сацсетак, прыбрала з кватэры ўсё, што магло хоць неяк скампраметаваць мяне. Аб маёй дзейнасці і працы не ведалі нават у сям'і», – расказвае журналістка.
У траўні 2024 года ў яе ўдома правялі ператрус. Нічога не знайшлі, бо працоўны камп’ютар яна трымала па-за домам, а тэлефон паспела скінуць да завадскіх наладаў і адкрыла запасны ўліковы запіс. Яе дапытвалі чатыры гадзіны, ёй удалося пераканаць следчага, што яна ні да чаго не датычная – і застацца на волі. Але ў жніўні яе выклікалі на новы допыт у сувязі з тым, што да 2021 года яна атрымлівала заробак на картку беларускага банку.
Пасля гэтага яна зразумела, што на гэты раз не ўдасца пазбегнуць бяды. Звярнулася ў «BYSOL» – яе эвакуявалі разам з двума дзецьмі.
,,«Уцякалі мы проста з лецішча, з адным заплечнікам, – расказвае журналістка. – Цяпер даводзіцца пачынаць жыццё з нуля. Майму малодшаму сыну 3 гады, ён асаблівае дзіця. Раз на паўгода яму трэба правяраць сэрца, а таксама патрэбныя заняткі з дэфектолагам. У Беларусі ён займаўся два разы на тыдзень. Цяпер мы губляем усё, што малы напрацаваў са спецыялістам».
Журналістцы ў Беларусі хапала сродкаў і на сям’ю, і на дапамогу іншым, але незапланаваны пераезд даецца вельмі цяжка – не стае нават на абавязковыя рэчы.
На «BYSOL» трывае таксама збор на дапамогу сям’і аўтаркі праекту «Беларус беларусу» Валярыны Куставай і мноства іншых збораў асобным беларусам, пацярпелым ад рэпрэсіяў ці вайны, а таксама ініцыятывам салідарнасці.
