Прычыны затрымання невядомыя, але, як мяркуе крыніца «Наша ніва», палітычныя.
Як даведалася «Наша ніва», менская музычная тусоўка актыўна абмяркоўвае затрыманне Івана Вабішчэвіча – спевака і шоўмена, які выступаў пад псеўданімам Дзядзя Ваня. Шоўмен актыўна вёў Instagram, але перастаў абнаўляць яго і з’яўляцца ў іншых сацыяльных сетках і мэсэнджарах у канцы верасня.
Прычыны затрымання невядомыя, але крыніца выдання думае, што да шоўмена маглі прыйсці праз палітычныя прычыны – пратэсты 2020 года на Віцебшчыне.
«Рэч у тым, што ў сілавікоў і раней узнікалі пытанні да яго, але гэтыя прэтэнзіі нібыта ўдалося ўрэгуляваць, і Дзядзя Ваня працягнуў музычную дзейнасць, – піша «Наша ніва». – Праўда, выступаў ён перадусім у Расеі. Калі паглядзець у ягоным „інстаграме" анонсы ягоных канцэртаў, то там спрэс маскоўскія пляцоўкі».
Знаёмыя Вабішчэвіча пакуль тэарэтычна дапускаюць, што прычынай арышту маглі стацца і іншыя пытанні – напрыклад, грашовыя.
Пра актыўны ўдзеле Вабішчэвіча ў пратэстах або падтрыманне апазіцыйных палітыкаў невядома. Хіба ў чэрвені 2020 года ён пісаў у Instagram, што ганарыцца беларусамі, якія «перастаюць баяцца» і ўсвядомілі, што «мы не „народзец“, а народ».
Алесь Наваборскі belsat.eu
