навіны

Пакуль Канапацкая будзе збіраць подпісы на выбары-2025, маюць завочна судзіць ейную давераную асобу з 2020-га

Ежы Грыгенча на акцыі ў 510-ую гадавіну бітвы пад Воршай
Ежы Грыгенча на акцыі ў 510-ую гадавіну бітвы пад Воршай. Беласток, Польшча. 8 верасня 2024 года. Фота: Ежик Григенча / Facebook
podpis źródła zdjęcia

Ежы Грыгенча абвінавачаны ў «Спрыянні экстрэмісцкай дзейнасці», «Распальванні варожасці», «Паклёпе на Лукашэнку» і «Знявазе Лукашэнкі».

«Кандыдаты ў кандыдаты», чые ініцыятыўныя групы былі зарэгістраваныя станам на 31 кастрычніка 2024 года: Вольга Чамаданава, Аляксандр Лукашэнка, Аляксандр Хіжняк, Алег Гайдукевіч. Калаж з фота: president.gov.by / gaidukevich77 / Instagram / Rpts.by / Bsu.by / Белсат
7 «кандыдатаў у кандыдаты» ў прэзідэнты. Хто яны? навіны

У Гарадзенскім абласным судзе 11 лістапада пачнуць разглядаць крымінальную справу супраць гарадзенскага актывіста і сябра Аб’яднанай грамадзянскай партыі Ежы Грыгенчы. Яго вінавацяць паводле чатырох палітычных крымінальных артыкулаў. Сам Грыгенча застаецца за межамі Беларусі пасля адміністратыўных пакаранняў за акцыі пратэсту 2020 года.


Ежы Грыгенча быў у 2020 годзе даверанай асобай кандыдаткі ў прэзідэнты Ганны Канапацкай. Сёлета ініцыятыўную групу Канапацкай ізноў зарэгістравалі – таксама зарэгістравалі ініцыятыўныя групы за Аляксандра Лукашэнку і яшчэ пяцярых «кандыдатаў у кандыдаты». З 7 лістапада Канапацкая можа збіраць подпісы за сваё вылучэнне кандыдаткай на прэзідэнцтва для выбараў-2025.


Ганна Канапацкая – былая дэпутатка Палаты прадстаўнікоў ад Аб’яднанай грамадзянскай партыі (2016–2019). У 2019 годзе заявіла пра выхад з АГП і была выключаная. На выбарах 2020 года крытыкавала найперш Ціханоўскую. Пасля 2020 года пра Канапацкую амаль не было чуваць у публічнай прасторы. У 2021 годзе яна брала ўдзел у VI Усебеларускім народным сходзе і назвала яго «сходам пераможцаў».


У пачатку паседжання ЦВК, прысвечанага рэгістрацыі ініцыятыўных групаў, запусцілі дзяржаўны гімн – і Канапацкая была ці не адзінай, хто не толькі падняўся, але і спяваў.


Пасля рэгістрацыі ініцыятыўнай групы Канапацкая напісала на Facebook, што «тысячы» ейных прыхільнікаў «гатовыя ўзяць удзел у зборы подпісаў». Яна заклікала: «Але, калі ласка, без залішняй самадзейнасці, у гэты раз усё яшчэ больш строга». Яна паабяцала неўзабаве даць кантакты юрыстаў, якія «дапамогуць правільна і бяспечна адпрацаваць у кампаніі 2025 года».


Адзіны «кандыдат у кандыдаты», які выступаў адназначна супраць Лукашэнкі, не быў дапушчаны да збору подпісаў: лідару руху «За свабоду» Юрасю Губарэвічу адмовілі ў рэгістрацыі ініцыятыўнай групы, спаслаўшыся спачатку на тое, што падача заявы праз пошту (Губарэвіч застаецца за мяжой) нібы не прадугледжаная заканадаўствам, а затым на тое, што «можна казаць пра несур’ёзнасць намераў».


Рэшта «кандыдатаў у кандыдаты» або не выказваецца супраць Лукашэнкі, або адкрыта падтрымлівае яго.


Дэмакратычныя сілы заклікаюць байкатаваць гэтыя выбары – актыўна ці пасіўна. Еўрапарламент ужо заявіў, што выбары ў Беларусі не могуць лічыцца справядлівымі і свабоднымі.


Алесь Наваборскі belsat.eu

больш па гэтай тэме

Глядзіце больш
Item 1 of 4

апошнія

Item 1 of 10