У ноч з 3 на 4 лістапада ў Беларусь з Украіны заляцелі мінімум два расейскія «шагэды», паведамляе маніторынгавая група «Беларускі Гаюн».
Адзін з дронаў заляцеў у Беларусь у раёне паўночы недалёка ад вёскі Дабранка і ішоў у напрамку Гомеля і Рэчыцы. Яшчэ адзін прайшоў праз Беларусь па маршруце з украінскага Славуціча да Прыпяці прыкладна праз паўтары гадзіны.
«Акрамя гэтага, маніторынгавыя каналы фіксавалі рух у кірунку Беларусі яшчэ трох "шагэдаў", якія ляцелі з боку Бранскай вобласці, што з імі адбылося далей – невядома. Адзначым, што дзяжурная авіяцыя ВПС РБ за ноч не падымалася», – піша «Беларускі Гаюн».
Расейскія дроны цягам некалькіх месяцаў рэгулярна залятаюць на тэрыторыю Беларусі з Украіны. Аднак авіяцыя не падымаецца не заўсёды. Напрыклад, ноччу з 31 кастрычніка на 1 лістапада з-за дронаў быў узняты знішчальнік з аэрадрома «Баранавічы».
Упершыню Беларусь падняла знішчальнік з гэтай жа прычыны 5 верасня.
Арсен Рудэнка belsat.eu
