Абраная прэзідэнтка Беларусі Святлана Ціханоўская павіншавала кіраўніцу Малдовы Маю Санду з перамогай на прэзідэнцкіх выбарах.
«Дэмакратыя перамагла. Еўропа перамагла. Вітаю, дарагая Мая Санду, з пераабраннем на пасаду прэзідэнткі Малдовы. Вашае моцнае лідарства вядзе Малдову да яе еўрапейскай будучыні. Народ Беларусі падзяляе тую ж прыхільнасць свабодзе і праву вызначаць свой уласны лёс», – адзначыла Святлана Ціханоўская ў X.
Дзейная кіраўніца Малдовы Мая Санду, якая рэпрэзентуе праеўрапейскія і празаходнія сілы, перамагае ў другім туры выбараў на прэзідэнцтва краіны. Паводле звестак малдаўскага ЦВК, пасля падліку 99,68 % бюлетэняў яна набірае 55,35 % галасоў. Ейны супернік, былы генеральны пракурор Александр Стаяногла ад Партыі сацыялістаў, атрымлівае 44,65 %. Пры гэтым ён перамог на ўчастках, што месцяцца на тэрыторыі Малдовы, а вось дзейную прэзідэнтку наперад вывелі галасы выбарцаў з-за межаў краіны.
Год таму Ціханоўская наведала з афіцыйным візітам Кішынэў, дзе сустрэлася ў тым ліку з Санду. Малдова – гэта першая краіна СНД, якую наведала абраная прэзідэнтка Беларусі.
Макар Мыш belsat.eu
