Крыніца «Белсату» расказала, як прыходзяць да пратэстоўцаў і іхных сваякоў на Гомельшчыне. Паведамляюць пра масавыя затрыманні пад Асіповічамі ды затрыманні ў іншых раёнах Беларусі.
Рэйды на Гомельшчыне
У Гомельскай вобласці да людзей, якія мелі ці маглі мець любое дачыненне да палітычнай актыўнасці ў 2020 годзе, прыходзяць сілавікі, расказвае крыніца «Белсату». У тым ліку заяўляюцца да родных тых палітвязняў, якія эмігравалі. Сілавікі пытаюць, дзе сваякі, а самім блізкім пагражаюць.
Крыніца «Белсату» расказвае, што сілавікі забіраюць тэлефон, у якім няма ніякіх падпісак, і на вачах уладальніка гэтага тэлефона падпісваюць яго ці яе на названы «экстрэмісцкім» Telegram-канал, канфіскуюць тэлефон і пагражаюць, што «ўсё, чалавек на валасінцы», маўляў, «чакайце, вас выклічуць».
Таксама крыніца «Белсату» расказвае такую гісторыю: сілавікі прыйшлі да жанчыны з малым дзіцём. Завіталі ўранку, супрацоўнікі Камітэту дзяржаўнай бяспекі паказалі ордар на ператрус праз «падазрэнне ў здрадзе дзяржаве». Сцвярджалі, што маюць фота жанчыны на пратэстах, але прапаноўвалі самой прызнацца. Калі яна не прызналася, паказалі ейнае фота на пратэстах. Але чамусьці выпісалі толькі штраф і сказалі прыйсці ў суд.
Затрыманні ў Ялізаве пад Асіповічамі
Паводле звестак «Нашай Нівы», у пасёлку Ялізава, што пад Асіповічамі, прайшоў рэйд сілавікоў, у выніку якога затрымалі як мінімум 14 чалавек. У затрыманых шукалі падпіскі на «экстрэмісцкія» рэсурсы. Да суда адпусцілі як мінімум дзвюх жанчын, але частка затрыманых застаецца пад вартаю.
У Ялізаве, адзначае «Наша Ніва», жывуць усяго каля 2000 чалавек, там ніколі не было арганізаваных структураў апазіцыі ці незалежных грамадскіх арганізацыяў. Хоць у часе пратэстаў у 2020 годзе людзі стаялі ў ланцугу салідарнасці ўздоўж шашы, іншай значнай пратэставай актыўнасці не было.
На думку «Нашай Нівы», затрыманні ў такім невялікім паселішчы даюць уяўленне пра маштаб рэпрэсіяў ува ўсёй краіне.
Хваля затрыманняў ці не па ўсёй Беларусі
Праваабарончы цэнтр «Вясна» паведамляў апошнім часам пра паходы сілавікоў па ўдзельніках пратэстаў-2020 у Маладзечанскім раёне, Смаргоні і Ваўкавыску. Журналісты паведамляюць пра затрыманні ў Менску і Гомлі 31 кастрычніка.
Паводле звестак «Вясны», каля 20 чалавек затрымалі ў Хойніках на масласырзаводзе. Паводле звестак «Mayday», 31 кастрычніка ў Магілёве затрымалі каля дзясятка чалавек.
«Наша Ніва» сцвярджае, са спасылкаю на ўласную крыніцу, што перад сілавікамі паставілі задачу «прафілактаваць» усіх, хто можа пратэставаць перад выбарамі ці ў часе галасавання.
Складзеныя спісы тых, хто падлягае прэвентыўным вобшукам і затрыманням, так званыя першы і другі спісы. У «першы спіс» уваходзяць усе тыя, хто раней быў асуджаны паводле адміністратыўных ці крымінальных артыкулаў. У «другі спіс» уваходзяць людзі, якія раней не прыцягваліся да адказнасці з палітычных матываў, але якія лічацца патэнцыйна нелаяльнымі, палітычна актыўнымі. Прыходы да людзей з першага спісу былі запланаваныя ўжо на восень. Аднак найбольш інтэнсіўныя рэпрэсіі запланаваныя на снежань–студзень.
,,«Калі ў чалавека ў тэлефоне няма падпісак – падпісаць. Калі трэба – прынесці сцяг і сфатаграфаваць у кватэры», – цытуе крыніца «Нашай Нівы» ўказанні сілавікам.
Ціханоўская: Лукашэнка спрабуе паказаць, што «грамадства перагарнула старонку», але затрыманні паказваюць адваротнае
Абраная прэзідэнтка Беларусі Святлана Ціханоўская пракаментавала хвалю затрыманняў:
Ціханоўская пагадзілася з «Нашай Нівай»: на падставе затрыманняў у Ялізаве можна ўявіць колькасць затрыманняў па ўсёй Беларусі. Яна дадала, што цяпер перад затрыманнямі ў людзей праз аператара адключаюць мабільную сувязь. І нагадала, што з палітвязняў і нават адміністратыўна арыштаваных здзекуюцца фізічна і псіхалагічна.
Затрыманні адбываюцца на тле перадвыбарчай кампаніі і паказваюць, што «стабільнасць рэжыму пабудаваная не на даверы, а на прымусе і страху», рэзюмавала Ціханоўская. Яна заклікала беларусаў трымацца разам і паказваць «простымі чалавечымі жэстамі», што «мы ёсць адно ў аднаго».
Надзея Вольная, Алесь Наваборскі belsat.eu
