Міністэрства антыманапольнага рэгулявання і гандлю разгледзела прэтэнзіі грамадзянаў, якія абурыліся з нагоды жаргонных назваў гумавых цацак у крамах сеткі.
У якасці прыкладу МАРГ прывёў імя героя калекцыі бірулек «Трэшыкі» ад сеткі «Суседзі», якой валодае кампанія «ЛібрэцікГруп». Завуць яго Памыіч.
«Указаная рэклама парушае агульнапрынятыя нормы маралі і маральнасці – у беларускім грамадстве непрымальнае публічнае выкарыстанне (у тым ліку ў рэкламе) жаргонных словаў пра смецце і прыбіральню», – лічыць прэс-служба МАРГ.
МАРГ «настойліва рэкамендаваў» рэкламадаўцам і блогерам не выкарыстоўваць зняважлівых і жаргонных (непрыстойных) словаў у любой рэкламе. У выніку «Суседзям» загадалі прыбраць гэтую рэкламу, сетка крамаў ужо ўсё выканала.
Дарэчы, у арт. 26 закону «Аб рэкламе» няма наўпроставай забароны на «туалетны гумар» або жаргонныя словы. Але МАРГ палічыў, што такія словы адносяцца да «інфармацыі, якая парушае агульнапрынятыя нормы маралі і маральнасці».
Пры гэтым гарэлка «Бульбашъ» у МАРГ пытанняў не выклікае, хаця яе можна аднесці да неэтычнай рэкламы паводле пункту «абразлівыя словы, параўнанні, вобразы ў дачыненні расы, нацыянальнасці». Нават Берасцейскі аблвыканкам у 2018 годзе палічыў выкарыстанне слова «бульбаш» неэтычным.
Тэса Анэйда belsat.eu
