Інцыдэнт адбыўся ўвечары 30 кастрычніка ў Кіраўскім раёне, калі першакурсніцы каледжу вярталіся з заняткаў у інтэрнат, і іхную ўвагу вырашыў прыцягнуць да сябе хлопец. Скончылася ўсё трагічна.
Непадалёк ад інтэрнату размаўлялі трое хлопцаў, старэйшы з іх вырашыў звярнуць на сябе ўвагу дзяўчат і пачаў выхваляцца пісталетам, які напярэдадні ў яго дома пакінуў прыяцель.
«Ён зрабіў некалькі стрэлаў у кірунку дзяўчат, на што адна з іх рэзка адрэагавала, паміж імі завязалася лаянка. Адышоўшы далей ад хлопцаў, яны прыселі на прыступкі ганка, аднак малады чалавек не сунімаўся, а затым зноў стрэліў у іх бок некалькі разоў. У гэты момант адна з дзяўчат закрыла твар рукамі і закрычала. З траўмай вока яна была шпіталізаваная», – піша Следчы камітэт Беларусі.
Кіраўскі раённы аддзел Следчага камітэту праводзіць праверку.
Тэса Анэйда belsat.eu
