Дыпламаты краінаў ЕЗ прыйшлі ў Курапаты з кветкамі 31 кастрычніка. Пра гэта распавяла ў «Х» часовая павераная Літвы ў справах Беларусі Аста Андрыяўскіене.
«Напярэдадні Дзядоў, Дня памяці продкаў, паводле даўняй традыцыі дыпламаты краінаў Еўрапейскага Звязу наведалі Курапаты, каб ушанаваць памяць пра незлічоныя жыцці і таленты, знішчаныя пошасцю таталітарызму», – напісала Аста Андрыяўскіене.
Курапаты – месца масавых расстрэлаў і пахаванняў у час сталінскіх рэпрэсій. Паводле розных ацэнак, колькасць ахвяраў, пахаваных у Курапатах, складае ад 30 тысячаў да больш як 250 тысячаў чалавек.
Праўда пра гэтае месца зрабілася шырока вядомаю ў 1988 годзе пасля публікацыі ў газеце «Літаратура і мастацтва» артыкулу Зянона Пазняка і Яўгена Шмыгалёва «Курапаты: дарога смерці».
Беларускія ўлады спрабуюць змагацца з Курапатамі. У 2018 годзе ўсяго за 50 метраў ад месца масавых расстрэлаў там хацелі пабудаваць рэстарацыю. А ў 2019 годзе там зносілі крыжы, што ўсталявалі актывісты.
Падчас пратэстаў восенню 2020 года сілавікі не пасаромеліся арыштоўваць людзей, якія ішлі да Курапатаў.
Дзяржпрапаганда выпускае артыкулы, у якіх асуджае заходніх дыпламатаў за тое, што яны прыходзяць ушанаваць ахвяраў сталінскіх рэпрэсіяў.
Арсен Рудэнка belsat.eu
