Ніну Багінскую затрымалі міліцыянты ўчора ўвечары на плошчы Незалежнасці ў Менску. Пра гэта стала вядома з крыніцаў «Белсату».
Затрыманне адбылося ў той момант, калі Багінская завязвала бел-чырвона-белую стужачку на дрэве каля зачыненага будынку Чырвонага касцёлу ў Менску.
Паводле інфармацыі «Белсату», у Маскоўскім РУУС на Багінскую склалі адміністратыўны пратакол. Міліцыянты пратрымалі жанчыну ў РУУС больш за дзве гадзіны і адпусцілі да суда дамоў.
Ніне Багінскай пагражае другі суд за апошнія 11 дзён. 19 кастрычніка міліцыянты затрымалі яе на рагу праспекту Незалежнасці і вуліцы Казлова, калі спадарыня Ніна з плакатам: «БНФ» рушыла да будынку, дзе некалі месцілася сядзіба партыі БНФ. Яна хацела такім чынам нагадаць грамадскасці, што ў той дзень 36 гадоў таму быў створаны аргкамітэт Беларускага народнага фронту, з якога пачаўся самы масавы апазіцыйны рух у Беларусі. У Савецкім РУУС на Ніну Багінскую быў складзены адміністратыўны пратакол, які яна адмовілася прачытаць і падпісаць.
Актывістка з канца 1980-х удзельнічае ў вулічных акцыях апазіцыі, а таксама ладзіць іх самастойна. Яе часта штрафавалі, сума штрафаў пераваліла за 20 тысяч долараў. Грошы вылічваюць з пенсіі спадарыні Багінскай, але, паколькі ўлады палічылі, што гэтага недастаткова, то ў пенсіянеркі канфіскавалі дачу з зямельным надзелам. Акрамя таго, жанчыне забаронена да пагашэння доўгу карыстацца паслугамі мабільнай сувязі.
Любоў Лунёва belsat.eu
