Саўмін павялічыў фінансаванне Мінпрыроды на Br 5,48 млн. Гэтыя грошы плануецца выдаткаваць на працы геалагічнага вывучэння нетраў.
Адпаведную пастанову № 802 Саўмін падпісаў 30 кастрычніка. Мінпрыроды атрымае больш сродкаў за кошт змяншэння выдаткаў рэспубліканскага бюджэту, якія планаваліся выдаткаваць на абслугоўванне вонкавага дзяржаўнага доўгу.
На абслугоўванне ўсяго дзярждоўгу з рэспубліканскага бюджэту ў 2024 годзе планавалася накіраваць Br 5305,2 млн.
Пастанова Саўміну супала з тым, што 12 кастрычніка Аляксандр Лукашэнка заявіў, што чарговым разам Беларусь будзе шукаць нафту. Ён паведаміў, што краіна дамовілася з расейскай кампаніяй «Роснефть» вывучыць нетры Гомельскай вобласці і знайсці там нафту.
,,«Памацаем сур'ёзна тэрыторыі Гомельскай вобласці. І мы абавязкова знойдзем там нафту», – сказаў Лукашэнка.
У 2024 годзе Саўмін ужо некалькі разоў размяркоўваў сродкі на абслугоўванне дзярждоўгу на іншыя мэты. Напрыклад, у чэрвені пастанавілі даць ДТСААФ дадатковае фінансаванне на Br 3,85 млн для закупу авіяцыйнай тэхнікі. А мытным органам – вылучыць Br 2,24 млн для гарантавання кібербяспекі і рэагавання на кіберінцыдэнты.
Арсен Рудэнка belsat.eu
