Былая прэс-сакратарка МУС, а цяпер галоўная ідэолаг Менску Вольга Чамаданава падала дакументы ў ЦВК аб рэгістрацыі ініцыятыўнай групы дзеля вылучэння яе кандыдаткай на прэзідэнцтва.
Яе вылучылі патэнцыйнай кандыдаткай на прэзідэнцтва на паседжанні праўлення Беларускага саюзу жанчын. Вядома, што Чамаданава падала дакументы ў ЦВК асабіста.
Пачынала кар'еру Чамаданава ўчастковым інспектарам у Бараўлянскім аддзеле міліцыі, пасля чаго ўзначаліла там жа Інспекцыю па справах непаўнагадовых.
Праз 12 гадоў, у канцы 2018-га, на пенсію пайшоў тагачасны прэс-сакратар МУС, і падпалкоўнік Вольга Чамаданава заняла яго месца. У 2019 годзе павысілі і яе мужа: палкоўнік Дзяніс Чамаданаў заняў месца начальніка 2-га ўпраўлення ГУБАЗіК. Ён і зараз на пасадзе (а яшчэ ў спісе санкцый ЕЗ).
Чамаданава па прыходзе на пасаду прэс-сакратара МУС стварыла Telegram канал структуры, у якім увесь 2020 год ігнаравала інфармацыю аб гвалце над затрыманымі, называючы «фэйкамі» большасць навін, якія супярэчаць афіцыйнаму курсу.
За яе «абразу» у Беларусі асудзілі як мінімум дваіх чалавек – на 1,5 і 2 гады «хіміі».
«Усе падзеі, якія на тэлеграм-канале размяшчаліся, прынамсі, каментаваліся ад МУС так ці інакш былі звязаныя з тым самым перадвыбарным перыядам. І я скажу больш, што, напэўна, менавіта ў гэты перыяд часу да 9 жніўня такія паведамленні з пагрозамі і абразамі, якія менавіта тычацца перадвыбарнай кампаніі, паступалі шматлікія», – паведамляла яна.
Нагадаем, сёння, за два дні да сканчэння тэрміну рэгістрацыі ініцыятыўных групаў вылучэння кандыдатаў на прэзідэнцтва, у ЦВК таксама падалі заяйкі на ўдзел у выбарах Алег Гайдукевіч (Ліберальна-дэмакратычная партыя Беларусі) і Аляксандр Хіжняк (Рэспубліканская партыя працы і справядлівасці).
Тэса Анэйда belsat.eu
