Міністэрства аховы здароўя падрыхтавала закрытую справаздачу. Але дзякуючы BELPOL, яна трапіла у адкрыты доступ. У тым самым дакуменце на 270 старонак медыкі выявілі шмат цікавай інфармацыі.
Як стала вядома BELPOL, мінімальны нарматыў бюджэтнай забяспечанасці расходаў на ахову здароўя ў разліку на аднаго жыхара Беларусі ў 2023 годзе склаў 886,80 рубля. Гэта прыкладна 270 долараў. Для параўнання: у Расеі гэтая лічба дасягае прыкладна 500 - 600 долараў, у ЗША – 3 000 - 4 000 долараў.
Убачыўшы гэтыя лічбы, медыкі «Белых Халатаў» прыйшлі ў некаторае замяшанне:
«З гэтых паказчыкаў становіцца зусім незразумела, як пры падобным фінансаванні атрымоўваецца дасягаць рэкордна высокіх паказчыкаў эфектыўнасці працы аховы здароўя, нават у параўнанні з краінамі, дзе выдаткі на медыцыну на парадак вышэй».
Апублікаваныя таксама і кошты асобных медыцынскіх паслугаў. Так, напрыклад, стала вядома, што кошт 1 выезду брыгады «хуткай» абыходзіцца бюджэту ў 149 рублёў. Кошт 1 дня знаходжання ў стацыянары – 231 рубель, зварот да медыкаў у паліклініку – 47 рублёў.
Незвычайна выглядае і размеркаванне фінансавання па асобных артыкулах выдаткаў. Калі для менчукоў на лекавыя сродкі выдзяляецца 17,1% ад усіх выдаткаў на ахову здароўя, то для жыхароў абласцей гэты паказчык чамусьці значна меншы – ад 9% да 10,6%.
Яшчэ раз пацвердзіўся і той факт, што ў Беларусі імкліва падае нараджальнасць.
«У 2023 годзе ў родадапаможных установах рэспублікі і дома было зарэгістравана 64 089 родаў (у 2022 - м –-69 691), што на 8,0% менш, чым у 2022 годзе», – напісана ў справаздачы. А гэта значыць, што нараджальнасць у 2023 годзе склала 6, 96 на 1 000 чалавек насельніцтва – і гэта, па словах медыкаў, самы нізкі паказчык за ўвесь час назіранняў з 1955 года. Раней ён не апускаўся ніжэй за 8,9.
Надзея Вольная belsat.eu
