У скверы ля Музею акупацыі і барацьбы за свабоду ў Вільні прайшла акцыя «Ноч (не)расстраляных паэтаў». Яе ўдзельнікі ўшанавалі памяць выбітных дзеячаў культуры, мастацтва і навукі тагачаснай БССР, забітых у ноч з 29 на 30 кастрычніка 1937 года. Агулам супрацоўнікамі НКВД былі расстраляныя 132 прадстаўніка беларускай інтэлігенцыі і культуры, сярод якіх былі 22 літаратары.
Падчас імпрэзы былі зачытаны вершы рэпрэсаваных савецкай уладай паэтаў. Агулам акцыя сабрала каля 150 чалавек: прадстаўнікі розных беларускіх арганізацый, мясцовыя беларусы і тыя, хто апынуўся ў вымушанай эміграцыі.
Ноч з 29 на 30 кастрычніка 1937 года стала адной з самых трагічных і чорных датаў у беларускай гісторыі ХХ стагоддзя. Акцыя памяці «Ноч (не)расстраляных паэтаў», якая праводзіцца штогод, прысвечана памяці беларускай інтэлегенцыі і іншых грамадскіх і культурных дзеячаў, якія сталі ахвярамі сталінскіх рэпрэсій. Сярод забітых у тую ноч былі выбітныя беларускія паэты, пісьменнікі, перакладчыкі: Міхась Чарот, Тодар Кляшторны, Анатоль Вольны, Юлі Таўбін і іншыя. Усе яны былі беспадстаўна абвінавачаныя ў «контррэвалюцыйнай дзейнасці» і «здрадзе Радзіме».
belsat.eu
