Сталася вядома, што з 28 кастрычніка «Белавія» адмяніла рэйсы з Гомля і Берасця ў Маскву, а з 29 кастрычніка – з Гомля ў Санкт-Пецярбург і Маскву.
Аб прыпыненні выканання рэйсаў нацыянальнага перавозчыка «Белавіі» з Берасця і Гомля ў Маскву і Санкт-Пецярбург «з тэхнічных прычынаў» паведамляе тэлеграм-канал «ОтВинта | Авиация Беларуси».
Як адзначаюць крыніцы тэлеграм-каналу, прычына скасавання рэйсаў крыецца ў «недахопе бартоў праз тэхабслугоўванне».
Са спасылкаю на звесткі авіясэрвісаў «Flightradar24» і «Planespotters» сцвярджаецца, што два самалёты авіякампаніі («Эмбраэр» і «Боінг») цяпер праходзяць тэхабслугоўванне.
«Яшчэ адзін «Эмбраэр» выкарыстаны для выязной серыі хакейнага клубу «Дынама» (Менск) [у Кантынентальнай хакейнай лізе]», – гаворыцца ў паведамленні.
Да таго ж, звяртае ўвагу тэлеграм-канал, «на гэтым тыдні ў раскладзе кампаніі значацца адразу два рэйсы ў Наябрск (Ямала-Ненецкая аўтаномная акруга РФ) па вахтавікоў».
«Ну і не будзем забываць пра павялічаную з учорашняга дня частату рэйсаў з Менску ў Баку і Дубай», – адзначаецца ў публікацыі.
Чакаецца, што палёты з беларускіх абласных цэнтраў адновяцца 4 лістапада.
Нагадаем, 21 кастрычніка сталася вядома, што «Победа» прыпыняе палёты з Масквы і Санкт-Пецярбургу ў Менск.
У офісе «Победы» заявілі, што прыпыненне рэйсаў будзе часовым: маўляў, толькі на зімовы перыяд. І што палёты павінны аднавіцца ў канцы сакавіка 2025 года.
Цікава, што навіна аб прыпыненні палётаў з'явілася на фоне інфармацыі пра тое, што агулам колькасць пасажыраў на авіярэйсах паміж Беларуссю і Расеяй за 2021–2023 гады вырасла ў 2,5 разу.
Надзея Вольная belsat.eu
