Міністэрства культуры і Міністэрства адукацыі Беларусі працягнулі міжведамаснае пагадненне, паводле якога школьнікі і навучэнцы, якія атрымліваюць прафесійна-тэхнічную і сярэднюю спецыяльную адукацыю, змогуць бясплатна наведваць музеі ў апошнюю сераду кожнага месяца.
«Пагадненне паміж Міністэрствамі адукацыі і культуры, якое прадугледжвае бясплатнае наведванне музеяў у апошнюю сераду кожнага месяца, было заключанае 15 верасня 2022 года. У верасні гэтага года падпісанае дадатковае пагадненне аб падаўжэнні дзеяння гэтага дакументу да 31 снежня 2026 года», – паведамляецца ў Telegram-канале Міністэрства адукацыі.
Апрача таго, у паведамленні сцвярджаецца, што наведаць дзяржаўныя музеі бясплатна або за льготную цану могуць усе ахвочыя, бо, згодна з Кодэксам аб культуры, кіраўнік кожнага музею вызначае канкрэтны дзень для такога наведвання. Інфармацыю пра гэта трэба шукаць на афіцыйных сайтах музеяў.
Надзея Вольная belsat.eu
