Бюджэт пражыткавага мінімуму (БПМ) складзе з 1 лістапада Br 437,8 замест Br 433. Услед за БПМ павышаюцца сацыяльныя выплаты на дзяцей і «ўзроставыя» пенсіі.
З 1 лістапада павялічваюцца памеры дзяржаўных дапамог сем'ям, якія выхоўваюць дзяцей, на 1,1%.
Аднаразовая дапамога ў звязку з нараджэннем дзіцяці складзе 10 БПМ, або Br 4378. Пры нараджэнні другога і наступных дзяцей дзяржава выплаціць 14 БПМ, або Br 6129,2.
Жанчыны, якія сталі на ўлік у арганізацыі аховы здароўя да12-тыднёвага тэрміну цяжарнасці, атрымаюць 100 % БПМ, або Br 437,8.
Штомесячная дапамога сем'ям на дзяцей ад 3 да 18 гадоў у перыяд выхавання дзіцяці векам да 3 гадоў складзе 50 % БПМ, або Br 218,9.
Штомесячная дапамога на дзяцей, старэйшых за 3 гады, з асобных катэгорыяў сем'яў складзе:
-️ на дзяцей, старэйшых за 3 гады, якія выхоўваюцца ў такіх сем'ях (акрамя дзіцяці-інваліда) – 50 % БПМ, або Br 218,9;
-️ на дзіця-інваліда, старэйшага за 3 гады, – 70 % БПМ, або Br 306,46.
Штомесячная дапамога для догляду дзіцяці-інваліда да 18 гадоў:
-️ з I і II ступенню страты здароўя да 18 гадоў і з III і IV ступенню страты здароўя да 3 гадоў – 100 % БПМ, або Br 437,8;
-️ з III і IV ступенню страты здароўя для дзіцяці, старэйшага за 3 гады, – 120 % БПМ, або Br 525,36.
Штомесячная дапамога на дзяцей векам да 18 гадоў, інфікаваных вірусам імунадэфіцыту чалавека – 70 % БПМ, або Br 306,46.
Выплатамі, што вылічаюцца з БПМ, у Беларусі ахопленыя больш за 167 тысячаў дзяцей, адзначаюць у Міністэрстве працы.
«Узроставыя» даплаты да пенсіяў таксама павялічваюцца на 1,1 %. Выплаты залежаць ад веку і складуць:
-️ для асобаў 75 –79 гадоў – Br 82,09;
-️ для асобаў ад 80 гадоў (з улікам надбаўкі на догляд) – Br 164,18, а пры наяўнасці інваліднасці I групы – Br 218,9.
«Узроставыя» даплаты да пенсіяў атрымліваюць больш за 537 тысячаў чалавек векам ад 75 гадоў.
Новы БПМ будзе дзеяць да 31 студзеня 2025 года. Гэты паказнік пераглядаецца чатыры разы на год. У 2024-м ён вырас на 19 %, адзначылі ў Мінпрацы.
Глеб Нержын belsat.eu
