Знаная грамадская актывістка Ніна Багінская можа ў хуткім часе стаць перад судом Савецкага раёну Менску.
«Белсату» стала вядома, што ўвечары 19 кастрычніка на вуліцы Казлова ў Менску Ніна Багінская выйшла з плакатам з напісам БНФ. Менавіта ў той дзень 36 гадоў таму быў створаны арганізацыйны камітэт Беларускага народнага фронту на паседжанні «Мартыролагу».
Спадарыня Багінская мела намер дайсці да будынку, на першым паверсе якога некалькі гадоў запар месцілася Управа БНФ – самай масавай партыі канца 1980-х і пачатку 2000-х гадоў. Актывістка хацела нагадаць грамадству, што менавіта з Беларускага народнага фронту пачаўся сучасны апазіцыйны рух у Беларусі. Некалькі гадоў запар у офісе партыі і на вуліцы каля яго штодня збіраліся людзі розных прафесіяў, каб абмеркаваць падзеі, падрыхтаваць правядзенне акцыяў ці папросту набыць газеты, часопісы або кнігі. Адрас Варвашэні 8 быў добра вядомы жыхарам не толькі беларускай сталіцы. Летась 14 жніўня Вярхоўны Суд Беларусі прыняў рашэнне аб ліквідацыі палітычнай партыі «Беларускі народны фронт». Дакладней таго, што ад яе засталося.
Сілавікі затрымалі Ніну Багінскую на рагу праспекту Незалежнасці і вуліцы Казлова. Жанчыну прывезлі ва Упраўленне ўнутраных справаў Савецкага раёну сталіцы. Там міліцыянт надзеў ёй кайданкі, прычым рукі закруціў за спіну, як небяспечнай злачынцы. У спадарыні Багінскай праблемы з плячом, жанчына папрасіла, каб, калі ўжо міліцыянты бачаць такую неабходнасць, то хаця б далі магчымаць трымаць рукі спераду. Але тыя праігнаравалі век жанчыны і ейны фізічны стан. Ніна Багінская адмовілася чытаць і падпісваць пратакол. Яе трымалі ў РУУС у кайданках амаль тры гадзіны і адпусцілі да суда толькі каля 22:00.
Дата суда невядомая. Практыка апошніх трох гадоў сведчыць, што звычайна позваў міліцыянты не дасылаюць поштай, а затрымліваюць людзей удома ці на працы.
Хутчэй за ўсё, Ніну Багінскую могуць пакараць чарговым штрафам. Жанчына бярэ ўдзел у акцыях апазіцыі з 1988 года з вялікам нацыянальным сцягам. Жанчына сама стала адным з сімвалам мірных пратэстаў Беларусі. Яе штрафавалі столькі разоў, што сума перавышае як мінімум 20 тысяч долараў. Летась і сёлета Багінскую некалькі разоў затрымлівалі за нацыянальную сімволіку і каралі штрафамі. Штрафы сплочваюцца з ейнай пенсіі, але, каб паскорыць працэс выплаты, прадалі лецішча жанчыны з зямельным надзелам. Яшчэ адно маленькае лецішча выставілі на продаж. Спадарыні Ніне забаронена карыстацца паслугамі мабільнай сувязі. Ёсць яшчэ пералік забаронаў: наведваць казіно, кіраваць яхтамі і маторнымі чаўнамі, а таксама паляваць – усё гэта выклікае ўсмешку актывісткі.
Любоў Лунёва belsat.eu
