Што прыгатаваць з гарбузоў ды кабачкоў? Наш топ-7 восеньскіх супоў

1.      Вяршковы грыбны суп са свежымі баравікамі

Якая восень без грыбоў? Сёлета яны даволі добра ўрадзілі, таму самы час штосьці з іх прыгатаваць. Напрыклад, суп.

Вам спатрэбяцца:

·      баравікі – 300 г
·      бульба – 120 г
·      масла вяршковае – 20 г
·      цыбуля рэпчатая – 60 г
·      часнык – 20 г
·      вяршкі 20% – 200 мл
·      вада – 1,5 л
·      лаўровы ліст – 1 шт.
·      кроп – 20 г
·      соль – 1 ч.л.

Як прытагаваць:

Цыбулю і часнык ачысціць, прамыць і дробна нарэзаць. У рондаль пакласці кавалачак вяршковага масла, растапіць яго на невялікім агні. Дадаць лук і часнык, смажыць да празрыстасці і лёгкага залацістага адцення (каля 5 хвілінаў).

Грыбы ачысціць, прамыць, парэзаць на сярэднія кавалачкі. Дадаць у рондаль да цыбулі і часныку, уліць ваду, пасаліць. Давесці да кіпення і варыць 20 хвілінаў.

Бульбу пачысціць і парэзаць на невялікія кавалачкі, дадаць у рондаль да баравікоў, давесці да кіпення і варыць 15 хвілінаў. Далей дадаць вяршкі, дробна парэзаны кроп і лаўровы ліст. Давесці да кіпення, варыць 1 хвіліну і выключаць. Суп гатовы. Перад падачай лепш даць яму крыху настаяцца.

2.     Суп з сушоных баравікоў

Вам спатрэбяцца:

·      баравікі сушоныя – 70 г
·      пярлоўка – 100 г
·      бульба – 2 шт.
·      морква – 1 шт.
·      цыбуля рэпчатая – 1 шт.
·      алей – 2 ст.л.
·      лаўровы ліст – 1 шт.
·      соль паводле смаку
·      смятана 18% - для падачы
·      кроп

Як прыгатаваць:

Сухія баравікі замачыць у халоднай вадзе на 20 хвілінаў. Затым ваду зліць, грыбы прамыць, зноў заліць халоднай вадой і пакінуць на 2 – 3 гадзіны. Гэтак жа і пярлоўку прамыць і замачыць у халоднай вадзе прыкладна на 2 гадзіны.

Праз 2 – 3 гадзіны грыбы дастаць, адціснуць і парэзаць на невялікія кавалачкі. Ваду з-пад грыбоў захавайце.

Пачысціце моркву, бульбу і цыбулю.

Ваду, у якой замочваліся грыбы, трэба пераліць у рондаль для варкі, але акуратна, бо на дне мог застацца пясок – трэба, каб ён не трапіў у рондаль. Дадаць ваду да 2 літраў, пакласці ў рондаль грыбы, паставіць на агонь і давесці да кіпення. Калі вада закіпіць, здымыце пену, якая ўтворыцца.

З пярлоўкі зліце ваду і пакладзіце крупы ў рондаль да грыбоў. Далей трэба давесці да кіпення і варыць на малым агні да гатовасці 40 – 50 хвілінаў. У працэсе варкі суп трэба пасаліць паводле смаку. 

Моркву парэзаць саломкай, цыбулю – дробнымі кубікамі, крыху пасмажыць іх разам на разагрэтым алеі. Бульбу парэзаць і разам з лаўровым лістом і смажанымі морквай і цыбуляй пакласці ў суп. Варыць яшчэ 15 хвілінаў да гатовасці бульбы. Выключыць і даць пастаяць каля 10 хвілінаў. Падаваць на стол са смятанай і кропам.

3.     Гарбузовы суп-пюрэ з вяршкамі

Яшчэ адзін класічны восеньскі прадукт – гарбузы. З іх можна не толькі выразаць ліхтары на Хэлоўін, але і прытагаваць сапраўды смачныя стравы. Напрыклад, гарбузовы суп-пюрэ з вяршкамі.

Вам спатрэбяцца:

·      бульён з гародніны – 700 мл
·      гарбуз – 800 г
·      цыбуля рэпчатая – 1 шт.
·      часнык – 2 зубчыкі
·      аліўкавы алей – 2 ст.л.
·      тлустыя вяршкі – 4 ст.л.
·      молатая каляндра – чвэрць сталовай лыжкі
·      соль – паводле смаку
·      свежамолаты белы перац – паводле смаку
·      гарбузовае насенне.

Як прыгатаваць: 

Гарбуз ачысціць, выдаліць насенне і парэзаць на кавалачкі. Цыбулю і часнык пачысціць. Часнык разціснуць шырокім бокам нажу, цыбулю нарэзаць тонкімі паўкольцамі.

У рондалі разагрэць аліўкавы алей і абсмажыць на ім цыбулю, каля 5 хвілінаў. Потым дадаць часнык і смажыць яшчэ 3 хвіліны.
Дадаць у рондаль гарбуз, каляндру і белы перац. Крыху пасаліць і ўліць бульён. Давесці да кіпення іварыць 20 хвілінаў пад крышкай на малым агні.

Праз 20 хвілінаў зняць суп з агню і змяльчыць блэндарам да стану пюрэ.

Пры падачы ў талерках суп апырскаць аліўкавым алеем, паліць вяршкамі і ўпрыгожыць гарбузовымі семечкамі. Спажываць адразу ў гарачым выглядзе.

4.     Суп-пюрэ з гарбуза з куркумой і імбірам (вельмі карысны ад інфекцыяў).

Вам спатрэбяцца:

·      гарбуз – 800 г
·      бульба – 250 г
·      масла вяршковае – 25 г
·      цыбуля рэпчатая – 1 шт.
·      часнык – 2 зубчыкі
·      куркума – 1 ч.л. парашку
·      свежы цёрты імбір – 1 ч.л.
·      памідоры – 1 шт.
·      бульён – 1,5 шклянкі
·      малако – 1 шклянка
·      насенне гарбуза, кавалачкі чылі, пятрушка, вяршкі – для падачы.

Як прыгатаваць:

Гарбуз ачысціць, выбраць з яго насенне, мякаць парэзаць на кавалачкі. Бульбу пачысціць і таксама парэзаць на кавалачкі.

Цыбулю і часнык пачысціць і парэзаць, пасмажыць у рондалі на вяршковым масле, дадаць гарбуз і бульбу, пасаліць, усыпаць куркуму і імбір, смажыць яшчэ хвілінаў 5. Уліць гарачы бульён, закрыць і варыць на сярэднім агні каля 10 хвілінаў.

Свежы памідор абдаць кіпнем, ачысціць, парэзаць на 4 часткі, выдаліць пладаножкі і насенне, мякаць парэзаць на кавалачкі і дадаць у суп. Перамяшаць і варыць 5 хвілінаў, пакуль гародніна не стане мяккай. Потым дадаць малако і змяльчыць блэндарам.

Падаваць з гарбузовымі семечкамі, крыху падсмажанымі на патэльні на аліўкавым алеі.

Наша даведка:

Гарбуз на стале беларусаў – “іншаземец”, як і бульба, але трапіў ён да нас значна раней – у ІХ – Х стагоддзях. Гарбуз спадабаўся нашым продкам тым, што мог доўга захоўвацца, аж да наступнага ўраджаю, а таксама сваім смакам.

Гарбуз – вельмі карысная гародніна. Ён утрымлівае вітаміны С, РР, Е, А, групы В, а таксама F, D і рэдкі вітамін Т, які ўдзельнічае ў акісленні свабодных тлустых кіслотаў і спрыяе зніжэнню аб'ёмаў тлушчавай тканіны і ўзроўню тлушчаў у крыві. У гарбузе ёсць жалеза, медзь, кобальт, калій, магній, кальцый, ёд, цынк, селен, клятчатка, раслінныя цукры, амінакіслоты, якія дапамагаюць падвышаць імунітэт і робяць арганізм больш абароненым ад інфекцыяў і розных захворванняў.

5.     Суп з кабачкоў з вяршкамі

А што вы робіце з самай мемнай гароднінай – кабачкамі? Мы прапануем прыгатаваць з іх суп.

Вам спатрэбяцца:

·      кабачок – 500 г
·      цыбуля рэпчатая – 100 г
·      часнык – 2 зубчыкі
·      вяршкі 20% – 200 мл
·      бульён – 300 мл
·      масла вяршковае – 10 г
·      соль – 1 ч.л.
·      перац чорны – паводле смаку
·      кроп
·      хлеб

Як прыгатаваць:

Цыбулю і часнык ачысціць і нарэзаць кавалачкамі. Кабачок прамыць і таксама парэзаць на кавалачкі.

У рондаль уліць алей і дадаць крыху вяршковага масла, паставіць на сярэдні агонь. Як толькі масла растопіцца ў алеі, дадаць цыбулю і часнык, смажыць іх каля дзвюх хвілінаў да залацістага колеру. Дадаць кабачкі, соль, чорны перац і бульён (курыны, з гародніны ці можна нават звычайную ваду – але ад гэтага будзе залежыць смак супу). Закрыць крышкай, давесці да кіпення і варыць 10 – 15 хвілінаў да гатовасці кабачку. Дадаць вяршкі.

Зноў давесці да кіпення, зняць з агню і змяльчыць блэндэрам да стану пюрэ.

Спажываць лепш адразу, свежым і гарачым. Пры падачы можна ўпрыгожыць дробна парэзаным кропам, іншай зелянінай. Падаваць з падсмажаным хлебам.

6.      Крупнік

Напрыканцы – два традыцыйныя беларускія супы. І першы з іх – крупнік. Яго варылі з ячменных, грачаных, прасяных альбо жытніх крупаў. З апошніх – рэдка, але прынамсі раз на год, у Іллін дзень 2 жніўня – такім чынам адзначалі збор маладога жыта.

Вам спатрэбяцца:

·      бульба – 1 шт.
·      цыбуля рэпчатая – 0,5 шт.
·      морква цёртая – 20 г
·      корань сельдэрэю – 20 г
·      грыбы (любыя, але лепш – баравікі) – 30 г
·      грачаныя крупы – 2 ст.л.
·      ячныя крупы – 1 ст.л.
·      кроп
·      смятана – 1 – 2 ст.л.
·      яечны жаўток – 1 шт.
·      мясны ці грыбны бульён – 1 шклянка
·      сала ці грудзінка – для смажання.

Як прыгатаваць:

Бульбу парэзаць сярэднімі кубікамі, цыбулю і сельдэрэй – дробнымі кубікамі. Усю гародніну разам з грыбамі абсмажыць у рондалі на сале да залацістага колеру, дадаць бульён, дробна парэзаны кроп і крупы (ячныя крупы папярэдне лепш замачыць на ноч у халоднай вадзе). Варыць 10 – 15 хвілінаў.

Суп мусіць атрымацца вельмі густым. Зверху на яго пакласці смятану, змазаць жаўтком і запекчы ў духоўцы 10 хвілінаў пры тэмпературы 180˚С.

Падаваць з зелянінай і хлебам.

7.     Класічны беларускі боршч

Ён гатуецца крыху інакш, чым традыцыйны ўкраінскі. У беларускі боршч ніколі не дадаецца капуста, а буряк адварваецца загадзя і дадаткова тушыцца на бураковым квасе.

Вам спатрэбяцца:

·      бурак вараны – 2 шт.
·      сала – невялікі кавалачак
·      таматная паста – 1 ст.л.
·      мука – 1 ст.л.
·     зеляніна (пятрушка, зялёная цыбуля, кроп)
·      бульён (на мясе ці костках) — 2 літры
·      бураковы квас — 2 шклянкі
·      цукар – 1 ч.л.
·      спецыі і смятана для падачы.

Як прыгатаваць:

Перш за ўсё – зрабіць бульён. Найлепш браць мяса на костцы – свініну, ялавічыну, качку ці бараніну. Таксама трэба зварыць бурак – прыкладна, 1,5 гадзінаў. Потым яго трэба парэзаць брусочкамі, пакласці ў рондаль і заліць бурачным квасам і крыху патушыць.

На патэльні падсмажыць сала, а на ім – нарэзаную дробнымі кубікамі цыбулю і цёртую моркву.

Бульбу нарэзаць буйнымі кубікамі. У рондаль заліць бульён і пакласці ў яго бульбу, дадаць зеляніну і лаўровы ліст.

Да бурака дадаць чайную лыжку цукру, перамяшаць.

У рондаль з бульёнам дадаць смажаныя цыбулю і моркву, дадаць спецыі. Далей боршч трэба забяліць мукой. Дзеля гэтага сталовую лыжку мукі размяшаць у палове шклянкі вады. З рондаля прыбраць лаўровы ліст і пятрушку, выліць туды мучную сумесь і добра размяшаць. Далей выкласці туды ж буряк і варыць усё разам да гатовасці.

Перад падачай баршчу трэба даць настаяцца. Падаваць са смятанай.

Смачна есці!

Ганна Ганчар belsat.eu