У Беларусі працягваюцца суды па абсурдных і надуманых абвінавачваннях, як, напрыклад, за тое, што слухаў гімн на стадыёне седзячы, а не стоячы. Хроніка рэпрэсіяў 28 кастрычніка – у нашым аглядзе.
Менчука аштрафавалі за тое, што ён не ўстаў падчас выканання гімну на стадыёне. Гэтым мужчына нібыта здзейсніў «незаконныя дзеянні ў дачыненні да дзяржаўных сімвалаў». Яму прызначылі штраф – 15 базавых велічыняў (600 рублёў). «Правапарушэнне» адбылося яшчэ ў 2023 годзе.
Сілавікі затрымалі актора «Беларусьфільму» Уладзіслава Ліпоўскага. У «пакаяльным відэа» затрыманы кажа, што быў падпісаны на «экстрэмісцкія» каналы і пакідаў каментары.
Перад выбарамі былым палітвязням выносяць «афіцыйныя папярэджанні». Вядома пра выклікі ў міліцыю людзей, якія стаяць на крымінальна-выхаваўчым уліку: як тых, што ўжо адбылі тэрміны, так і тых, хто цяпер на «хіміі». Палітвязням даюць падпісаць дакумент, што яны папярэджаныя пра забарону на «гвалтоўную змену канстытуцыйнага строю, захоп або ўтрыманне дзяржаўнай улады неканстытуцыйным шляхам».
Стала вядомая дата завочнага суду над актывістам Ежы Грыгенчам – ён распачнецца 11 лістапада. Грамадскаму актывісту з Горадні інкрымінаваныя чатыры крымінальныя артыкулы: ч. 1 арт. 130 («Распальванне варожасці»), ч. 1 арт. 361-4 («Садзейнічанне экстрэмісцкай дзейнасці»), ч. 2 арт. 367 («Паклёп на прэзідэнта»), ч. 1 арт. 368 («Абраза прэзідэнта»).
Актывіста запрашаюць вярнуцца ў Беларусь і прыйсці ў Гарадзенскі абласны суд.
У судзе Лунінецкага раёну 28 кастрычніка пачаўся разгляд крымінальнай справы супраць Артура Малчана і Артура Канапацкага паводле арт. 370 КК РБ («Глумленне з дзяржсімвалаў»). Хлопцаў абвінавачваюць у тым, што яны ў 2021 годзе знялі з будынку крамы дзяржаўны сцяг. Аднаго з затрыманых знайшлі па адбіткаў пальцаў, які той здаваў падчас прызыўной кампаніі ў 2024 годзе.
Марыя Міхалевіч belsat.eu
