Палітык таксама растлумачыў, навошта наагул у гэта ўвязаўся.
Лідар руху «За свабоду» паведаміў, што падаў у Цэнтрвыбаркам заяву на рэгістрацыю ініцыятыўнай групы для вылучэння яго кандыдатам на прэзідэнцтва. Юрась Губарэвіч падкрэсліў, што аніякіх фармальных перашкодаў для гэтага няма і што сабраць сярод дыяспары 100 тысячаў подпісаў – не праблема.
У каментары «Белсату» палітык сказаў, што проста «скарыстаўся сваім правам як грамадзянін Беларусі», пагатоў у хуткім часе такой магчымасці будзе пазбаўлены:
«Патэнцыйныя абмежаванні не далі б гэтага зрабіць, напэўна, у будучыні, бо, як вядома, супраць апанентаў Аляксандра Лукашэнкі заводзяцца крымінальныя справы, я таксама фігурант, напэўна, некалькіх справаў, аднак на сёння няма судовай пастановы ні ў воднай з іх».
Як растлумачыў Губарэвіч, мэта ягонай «акцыі» – прыцягнуць увагу да сітуацыі ў Беларусі і на справе даказаць, што закон у краіне не працуе:
«Прыцягнуць увагу да таго, што адбываецца ў Беларусі, і мець магчымасць даць ацэнку, грунтуючыся не толькі на нашых адчуваннях, словах або прадбачаннях таго, як будзе адбывацца выбарчы працэс, але і на практыцы. Перакананы, што Цэнтрвыбаркам знойдзе сотню прычынаў адмовіць у рэгістрацыі, але затое яны не здолеюць сказаць, што вы нават і не паспрабавалі. Я паспрабаваў».
Палітык адказаў на абвінавачанні ў тым, што сваімі дзеяннямі толькі падыгрывае цяперашнім уладам і прыцягвае ўвагу да выбараў. Кажа, што «мы не можам заплюшчваць вочы на тое, што будзе адбывацца»:
«Так, гэта не выбары, а выбарчы фарс, але ж людзей у Беларусі прымусяць на іх пайсці, інфармацыя пра гэтую падзею будзе на ўсіх старонках дзяржаўных медыяў».
Учынак Губарэвіча выклікаў збольшага негатыўныя каментары:
«Гэта спроба выйсці на дыялог з рэжымам ці проста дурасць?»
«Гэта забеспячэнне яўкі для рэжыму».
«Каб патролiць зачоса, то iдэя ОК. Можа, нават яму кепска стане на некаторы час. Але сумняюся, што набярэ патрэбную колькасць подпiсаў. Няма дурных раскрываць свае звесткі тым, хто за мяжою».
Палітыка такія закіды не засмуцілі. Маўляў, штораз такое.
«Такія каментары ўзнікаюць падчас кожнай выбарчай кампаніі, ведаю, што ў грамадстве ёсць пэўная частка асобаў, якія ўвогуле ніяк не ўспрымаюць выбары, і такую ж самую пазіцыю мелі ў 2020 годзе. Але ж практыка паказала, што наяўнасць альтэрнатыўных кандыдатаў – гэта тое, што зламала хрыбет фальсіфікацыям рэжыму», – сказаў Юрась Губарэвіч.
«Перадусім я старшыня руху “За свабоду” і ў палітычным полі ўжо некалькі дзясяткаў гадоў, таму я дзейнічаю самастойна, з уласнай ініцыятывы і не ўзгадняў гэтае рашэнне з іншымі ўстановамі», – сказаў Губарэвіч.
Суразмоўца «Белсату» запэўніў, што падзяляе стратэгію аб’яднаных дэмакратычных сілаў: «Яна палягае ў тым, што гэта не выбары, я ніколі не называў і не назаву гэтую палітычную кампанію выбарамі. Тыя грамадзяне, якіх прымусяць прыйсці, могуць выказаць свой пратэст, прагаласаваўшы супраць усіх».
Губарэвіч амаль упэўнены, што кандыдатам яго не зарэгіструюць, але, калі цуд адбудзецца, то «выкарыстае кампанію ў якасці публічнай трыбуны і будзе трансляваць супольную пазіцыю дэмакратычных сілаў».
Вітаўт Сіўчык, Сцяпан Кубік belsat.eu
