Пра гэта паведаміў у сваіх профілях у сацсетках адзін з заснавальнікаў праекту і кіраўнік Беларускай Рады культуры Сяргей Будкін.
Паводле Сяргея Будкіна, блакаванне адбылося на загад Міністэрства інфармацыі.
«Сітуацыя такая: на загад міністэрства інфармацыі Беларусі заблакаваны сайт праекту з 21-гадовай гісторыяй "Тузін Гітоў" (Tuzinfm.by) з каштоўным архівам за 2003–2020 гг.», – піша Будкін.
У прыватнасці, працягвае ён, заблакаваная праца асобных старонак, прысвечаных праектам «НЕрасстраляныя», «Перазагрузка», «Апошні золак», «Заспявай BY», «Тэлебудка», «Тузін.Немаўля», «Re:Песняры» і «100 найвялікшых беларускіх песень», а таксама праектам, прысвечаным памяці Анатоля Сыса, Сержука Вітушкі, Міхала Анемпадыстава ды іншыя.
Стваральнік праекту нагадаў, што спробы спыніць працу «Тузіна» рабіліся і раней: дзевяць гадоў таму тагачасная міністарка інфармацыі Лілія Ананіч накіравала на імя Сяргея Будкіна ліст з папярэджаннем, што доступ да рэсурсу можа быць абмежаваны «за распаўсюд непраўдзівай інфармацыі, якая можа нанесці шкоду дзяржаўным або грамадскім інтарэсам». Але ў лісце не паведамлялася, што гэта былі за парушэнні.
Гэтым разам аніякіх папярэджанняў не было: уладальнікі хостынгу атрымалі наўпроставы загад заблакаваць сайт.
У той жа час Сяргей Будкін заспакойвае, што ўвесь архіў сайту захоўваецца ў бяспецы.
Праект «Тузін гітоў» паўстаў у 2003 годзе і меў на мэце прапагандаванне музыкі, створанай у Беларусі. Станам на 2009 год ён меў больш за 50 тыс. штомесячных наведнікаў, якія спампоўвалі больш за 80 тыс. песняў.
Раман Шавель belsat.eu
