Цягам некалькіх дзён на беларуска-польскім пераходзе трымаецца вялікая чарга з аўтобусаў і аўтамабіляў.
Паводле інфармацыі Дзяржаўнага памежнага камітэту, на 12:00 на беларуска-польскай мяжы стаяць 1335 легкавых аўтамабіляў і 84 аўтобусы.
Паводле кіроўцаў аўтамабіляў, для мінання мяжы даводзіцца стаяць больш за двое содняў – і гэта для таго, каб толькі трапіць у зону чакання, уласна праходжанне мяжы займае параўнальна няшмат часу – каля 4 гадзінаў.
Нагадаем, што з 1 кастрычніка 2024 года ўвялі новую сістэму рэгістрацыі на мяжы. Згодна з ёю, пасля рэгістрацыі кіроўцы легкавікоў могуць выязджаць з зоны чакання і сачыць за сваёй чаргой на сайце «Белмытсэрвісу».
Паводле водгукаў некаторых кіроўцаў, з моманту рэгістрацыі да заезду на прапускны пункт цяпер можа праходзіць да 52 гадзінаў.
Шматлікія падарожнікі прыязджаюць на мяжу машынаю, праходзяць рэгістрацыю і пасля вяртаюцца дадому (гэтак, у прыватнасці, робяць жыхары Менску). Пасля, калі надыходзіць іхная чарга, яны зноў едуць на мяжу, каб ужо трапіць на прапускны пункт.
Некаторым кіроўцам такая сістэма падабаецца больш, бо не трэба стаяць гадзінамі «пасярод лесу» і траціць бензін на абагрэў машыны або на ўключэнне кандыцыянера.
Асабліва прадпрымальныя, як прыкмеціла выданне «Most Media», сталі прапаноўваць менчукам дадатковую паслугу – з’ездзіць іхнымі машынамі і зарэгістраваць яе ў зоне чакання, а пасля вярнуць аўта, каб уладальнік мог прыехаць на мяжу ў прызначаны час.
Ускладнілася сітуацыя мінання мяжы і для аўтобусаў. Кіроўцы аўтобусаў пішуць у памежныя чаты пра затрыманні рэйсаў і пераносы іх на наступны дзень, тлумачачы гэта спазненнямі праз доўгае праходжанне мяжы.
Па-ранейшаму дзеіць схема, пры якой можна да мяжы даехаць адным аўтобусам, а там перасесці ў аўтобус, што стаіць бліжэй да памежнага пункту. У сярэднім даплата за такую перасадку складае каля 30 еўраў. Але з дапамогаю такой схемы можна значна скараціць працэс праходжання мяжы. Паводле некаторых пасажыраў, ім удавалася такім чынам патраціць на гэта каля 10 гадзінаў. У адваротным выпадку дарога можа расцягнуцца на тыя ж двое содняў, што і пры чаканні ў аўтамабілі.
Адметна, што чэргаў з Польшчы ў Беларусь не назіраецца. Складанасці з доўгім праходжаннем памежнага пункту могуць узнікнуць толькі ў выпадку, калі на рэйсе ёсць украінцы. Паводле некаторых пасажыраў, з гэтай прычыны ў Тэрэспалі не хочуць браць на борт украінцаў.
Раман Шавель belsat.eu
