У Грузіі зачыніліся выбарчыя ўчасткі, пачаўся падлік галасоў. Дадзеныя экзітполаў адрозніваюцца: паводле адных, перамагла кіроўная партыя «Грузінская мара», паводле іншых – кааліцыя апазіцыі.
Па выніках апрацоўкі амаль 70 % бюлетэняў, кіроўная партыя «Грузінская мара» набірае 52,94 % галасоў, паведаміў Цэнтрвыбаркам краіны.
Яўка, паводле папярэдніх звестак, склала 58,94%, агулам прагаласавалі 2 060 412 чалавек. ЦВК прызнаў, што выбары адбыліся.
У Тбілісі можна заўважыць салюты, якія запускаюць прыхільнікі праўладнай партыі «Грузінская мара».
Экзітполы, якія з’яўляліся раней, давалі супярэчлівыя дадзеныя, якія адрозніваліся ў залежнасці ад таго, што за медыя іх публікуе. Так, блізкі да грузінскіх уладаў тэлеканал «Imedi» напісаў, што «Грузінская мара» мае 56,1 % галасоў, «Кааліцыя перамен» – 12,6%, «Адзінства – нацыянальны рух» – 11,6%, а «Моцная Грузія» – 7 %.
Згодна з версіяй апазіцыйнага канала «Mtavari», усё выглядае інакш: «Грузінская мара» – 42%, «Кааліцыя перамен» – 18%, «Адзінства – нацыянальны рух» – 13%, «Моцная Грузія» – 9%, «Гахарыя – За Грузію» – 8%.
Паводле апазіцыі, яна выйграла выбары. Прэзідэнтка краіны Саламэ Зурабішвілі напісала, што ўпэўненая ў перамозе апазіцыі.
«Еўрапейская Грузія» перамагае з 52% галасоў, пры спробе фальсіфікацыі выбараў і без галасоў дыяспары. Грузія прадэманстравала дэмакратыю, еўрапейскасць і спеласць... Я ганаруся і ўпэўненая ў нашай еўрапейскай будучыні!», – напісала яна ў сваім акаўнце сацсеткі «Х».
У той жа час паведамляецца пра адключэнне святла ў некаторых гарадах пасля заканчэння выбараў. Меракавана, гэта робіцца дзеля таго, каб фальсіфікаваць дадзеныя выбараў і прыпісаць кіроўнай партыі дадатковыя галасы.
26 кастрычніка ў Грузіі прайшлі парламенцкія выбары, якія самі грузіны называюць «лёсавызначальнымі». Фактычна грузінскае грамадства апынулася на раздарожжы паміж Еўразвязам і Расеяй.
У выбарах у парламент Грузіі, што складаецца са 150 дэпутатаў, бралі ўдзел 18 партыяў. Пройдуць тыя, якія па выніках выбараў пераадолеюць пяціадсоткавы бар’ер.
Паводле экспертаў, шансы на атрыманне дэпутацкіх мандатаў маюць толькі 5 партыяў: прарасейская кіроўная «Грузінская мара» і апазіцыйныя «Адзіны нацыянальны рух», «Кааліцыя пераменаў», «Моцная Грузія» і «За Грузію».
Агульная колькасць выбарнікаў у Грузіі – больш за 3,5 мільёна чалавек.
Раман Шавель belsat.eu
