Па польскім тэлебачанні паказалі рэпартаж, прысвечаны беларускаму бізнесоўцу Аляксандру Машэнскаму, якога лічаць блізкім да Аляксандра Лукашэнкі.
«Два абліччы беларускага алігарха» – пад такой назвай з’явіўся рэпартаж на адным з найбуйнейшых тэлеканалаў Польшчы TVN.
«Беларускі алігарх Аляксандар Машэнскі фінансуе рознага кшталту інвэстыцыі, якія прыдумляе Аляксандар Лукашэнка, а ў чацьвер збірае рэчы, сядае ў мэрсэдэс і прыязджае ў Варшаву, дзе жыве еўрапейскім жыццём. Тут і кавярні, і рэстараны, і на выхадныя з сям'ёй куды-небудзь можна злётаць на самалёце. Еўрапейскае жыццё», – кажа аўтар сюжэту.
У матэрыяле гаворыцца, што польскія ўлады дазволілі Аляксандру Машэнскаму жыць і працаваць у Варшаве, дзе ён арандуе кватэру і кіруе бізнесам – буйнымі рыбаперапрацоўчымі і малочнымі заводамі.
Паводле аўтара рэпартажу, Машэнскі баіцца трапіць у санкцыйныя спісы, а беларускі рэжым «больш за дзесяць гадоў выкарыстоўвае ўсе магчымыя сродкі, каб ён не трапіў у іх».
Аляксандра Машэнскага, гаворыцца ў сюжэце, некалькі разоў у розныя гады спрабавалі ўключыць у чарнавыя санкцыйныя спісы. Але найперш за яго заступаліся ісландскія палітыкі, бо эканоміка Ісландыі дэ-факта залежыць ад бізнесу Машэнскага, а вугорцы ў 2022 годзе дык увогуле наклалі вета на санкцыйны спіс.
Паводле словаў журналіста, беларускія ўлады разам з Аляксандрам Лукашэнкам «вельмі рашуча настроеныя выкарыстоўваць тыя рэсурсы, якія ў іх ёсць», бо Аляксандр Машэнскі можа мець ключавое для іх значэнне, таму што мае доступ да банкаўскай сістэмы Еўразвязу.
«Цяжка сказаць, чым ён [Аляксандр Машэнскі. – Заўв. рэд. «Белсат»] займаецца тут, у Варшаве», – адзначае журналіст.
Раман Шавель belsat.eu
