У Цэнтральную выбарчую камісію пададзеныя дакументы аб рэгістрацыі ініцыятыўнай групы грамадзянаў для збору подпісаў у падтрыманне вылучэння Аляксандра Лукашэнкі кандыдатам у прэзідэнты Рэспублікі Беларусь, паведамляе БелТА.
Кіраўнік ініцыятыўнай групы – старшыня Федэрацыі прафсаюзаў Беларусі Юрый Сянько.
Пасля рэгістрацыі ініцыятыўная група распачне збор подпісаў за Лукашэнку.
,,«Усе спецыялісты падрыхтаваныя, мы ўпэўненыя, што пройдзем гэты шлях вельмі прыгожа», – заявіў Сянько.
Паводле старшыні Федэрацыі прафсаюзаў, у ініцыятыўнай групе Лукашэнкі нашмат больш як 100 чалавек, патрэбных згодна з законам.
«Усе магчымыя формы збору подпісаў будуць выкарыстаныя», – сказаў Сянько.
25 кастрычніка пра намер балатавацца ў прэзідэнты паведаміў лідар Ліберальна-дэмакратычнай партыі Беларусі Алег Гайдукевіч.
Выбары прэзідэнта Беларусі прызначаныя на 26 студзеня 2025 года. Гэта будуць сёмыя ў гісторыі незалежнай Беларусі прэзідэнцкія выбары. Пасля папярэдніх, што адбыліся 9 жніўня 2020-га, у краіне пачаліся жорсткія масавыя рэпрэсіі, што працягваюцца дасюль.
Беларускія дэмакратычныя сілы прынялі агульную стратэгію, у якой прапаноўваюць галасаваць супраць усіх, калі ўлады не выканаюць шэрагу патрабаванняў, сярод якіх – спыненне рэпрэсіяў і вызваленне ўсіх палітвязняў.
Марыя Міхалевіч belsat.eu
