У ноч на суботу 26 кастрычніка расейская армія абстраляла ўкраінскі горад Днепр. Ракеты трапілі ў жылыя дамы і лякарню. Сярод загінулых і пацярпелых – дзеці, паведаміў кіраўнік Днепрапятроўскай абласной вайсковай адміністрацыі Сяргей Лысак.
У выніку ракетнай атакі былі пашкоджаныя 13 шматкватэрных дамоў, два прыватныя дамы, адзін з карпусоў лякарні. Цалкам разбураныя двухпавярховы жылы дом і гараж. Пад заваламі знайшлі жывую жанчыну, а таксама трох загінулых – дзвюх жанчын і адно дзіця.
Пацярпелі 19 чалавек, з іх – чацвёра дзяцей. Восем чалавек былі шпіталізаваныя.
На месцы ракетнай атакі працуюць выратавальнікі, працягваюцца пошукавыя работы.
У Ірпені, што ў Кіеўскай вобласці, праз падзенне абломкаў загарэўся двухпавярховы гараж, прыбудаваны да хостэлу, у ваколіцах Барыспалю пашкоджаны прыватны жылы дом. Адзін чалавек загінуў у лякарні, траўмаванае дзіця 2011 года нараджэння.
Увечары 25 кастрычніка, каля 21:00, у выніку ўдару беспілотніка ў Кіеве адбыўся пажар у 25-павярховым жылым доме, былі пашкоджаныя кватэры ад 17-га да 21-га паверху. У кватэры на 20-м паверсе, дзе ўзнік пажар, пазней ратавальнікі знайшлі цела загінулай 15-гадовай дзяўчыны. Больш за 100 жыльцоў дому былі эвакуяваныя.
Агулам за ноч над Кіевам былі знішчаныя да 10 беспілотнікаў, паветраная трывога ў сталіцы працягвалася сем з паловаю гадзіны.
Марыя Міхалевіч belsat.eu
