«Выбары», пенсія, нафта. Галоўныя падзеі ў малюнках

26.10.2024, 07:32

Малюнак: Дэ Лёс / Белсат

podpis źródła zdjęcia

За галоўнымі падзеямі, што ўплываюць на жыццё беларусаў ці выклікаюць шырокі рэзананс у грамадстве, разам з «Белсатам» сочыць мастак Дэ Лёс.

Аляксандр Лукашэнка 15 кастрычніка слухаў даклад пра сацыяльнае падтрыманне насельніцтва і паабяцаў дадатковую дапамогу «ўразлівым групам, як мы іх называем», перадае БелТА. Гаворка пра пенсіянераў, інвалідаў, дзяцей-сіротаў.

Што наабяцалі

Зняць абмежаванне на памеры пенсіяў для пенсіянераў, якія працуюць. Пакуль, калі пенсіянер працуе, яму выплачваюць няпоўную пенсію пры пэўным памеры заробку.
Разлічваць пенсію толькі з 30 гадоў мінулай працы, як цяпер, і не падвышаць гэтага тэрміну на год штогод, каб пазбегчы лішніх папяровых даведак, а лічыць на падставе звестак базы Фонду сацыяльнай абароны, якую запаўняюць з 2003-га.
Змяніць у лепшы бок умовы для шматдзетных і тых, хто выхоўвае дзяцей-інвалідаў. Гэтак, калі маці выхоўвае дзіця-інваліда, а бацька памёр, збіраюцца дазволіць атрымліваць павышаную сацыяльную пенсію, да Br 1000. Таксама збіраюцца дазволіць датэрмінова выходзіць на пенсію не толькі маці дзяцей-інвалідаў, але і бацькам.
Дазволіць платную (за 6–8 рублёў) дастаўку пенсіі праз пошту ці на дом для тых, каго абавязваюць атрымліваць пенсіі праз банкі.
Яшчэ нейкім чынам падтрымаць шматдзетных, спрасціць працэдуру звароту па пенсію, узмацніць адрасную дапамогу.

Улады Беларусі дазволілі расейскай кампаніі «Роснефть» вывучыць нетры Гомельскай вобласці, каб нарэшце знайсці там нафту. Пра гэта 12 кастрычніка заявіў Лукашэнка.

«Мы дамовіліся з кіраўніком «Роснефти», што «памацаем» сур'ёзна тэрыторыі Гомельскай вобласці. І мы абавязкова знойдзем там нафту – у савецкі час свідравіны прабурылі і кінулі. І мы гэтыя грошы скіруем на развіццё нашай Гомельшчыны», – перадае ягоныя словы БелТА.

Улады вызначыліся з датаю электаральнай кампаніі ў Беларусі. Выбары прэзідэнта прызначаныя на 26 студзеня 2025 года. Гэта будуць сёмыя ў гісторыі незалежнай Беларусі прэзідэнцкія выбары. Па выніках усіх папярэдніх у краіне «перамог» Аляксандр Лукашэнка.

Лідар ліберальна-дэмакратычнай партыі Беларусі Алег Гайдукевіч заявіў у эфіры Першага інфармацыйнага каналу, што будзе вылучаць сваю кандыдатуру на прэзідэнцтва Беларусі на выбарах у 2025 годзе. Алег Гайдукевіч падкрэсліў, што ягоная партыя не прапускала ніводных выбараў прэзідэнта ў Беларусі. На выбарах 2020-га Гайдукевіч-малодшы таксама быў кандыдатам, аднак пазней зняўся і заклікаў галасаваць за Лукашэнку.