Міжнародны крымінальны суд прызнаў, што Манголія не супрацоўнічала ў арышце і выдачы Уладзіміра Пуціна падчас ягонага візіту ва Улан-Батар у пачатку верасня 2024 года, хоць і была абавязаная як краіна, якая падпісала Рымскі статут.
МКС перадае справу ў Асамблею дзяржаваў ‒ удзельніц Рымскага статуту.
Міжнародны крымінальны суд падкрэслівае: усе дзяржавы-ўдзельніцы, што прызнаюць юрысдыкцыю суда, мусяць у поўнай меры супрацоўнічаць з судом і абавязаныя арыштоўваць і выдаваць асобаў, на якіх МКС выдаў ордар.
МКС выдаў ордар на арышт Пуціна ў сакавіку 2023 года ў звязку з падазрэннем у незаконнай дэпартацыі ўкраінскіх дзяцей з акупаваных Расеяй тэрыторыяў Украіны. У верасні 2024-га Пуцін наведаў Манголію, якая ёсць удзельніцаю Рымскага статуту, аднак не быў там арыштаваны.
Адвакат-міжнароднік Сяргей Галубок у каментары «Белсату» адзначаў, што Рымскі статут адназначна наказвае дзяржавам-удзельніцам арыштоўваць асобаў, згодна з ордарам Міжнароднага крымінальнага суда, і аніякіх іншых трактаванняў быць не можа.
Аднак адказнасць за невыкананне ордару на арышт не прадугледжаная. У Гаагскага трыбуналу няма ўласных сілавікоў, таму можна спадзявацца толькі на супрацу з краінамі ‒ удзельніцамі Рымскага статуту, падкрэсліў эксперт.
Марыя Міхалевіч belsat.eu
