«Белсат» падрыхтаваў падборку фільмаў, мультфільмаў і серыялаў, што можна глядзець без рызыкаў для ўласнай псіхікі.
Часы цяпер такія, што ў самую страшную ноч года – Гэлаўін – і хочацца нешта паглядзець, ды баішся за ўласную рэакцыю. Таму мы змеркавалі зрабіць падборку з 20 такіх фільмаў, мультфільмаў і серыялаў, што можна глядзець з задавальненнем. Увага: рэдакцыя не дае гарантыі, што лёгкі мульцік не выкліча ў вас адмоўных эмоцыяў.
Бітлджус (1988 г.)
Тым Бэртан стварыў геніяльную казку пра Бітлджуса – персанажа, які характарызуе сябе як біяэкзарцыст. Без гэтага фільма ўжо складана ўявіць сабе Гэлаўін. Калі раптам здарылася так, што вы не глядзелі гэтае кіно, тэрмінова запаўняйце гэты прагал.
Бітджус-2 (2024 г.)
Другая частка геніяльнага фільму, што таксама зняў Тым Бэртан. Адразу папярэджваем: калі не глядзелі першую частку, то шмат момантаў будуць вам незразумелымі. Першыя 20 хвілінаў фільму даволі сумныя, прадказальныя і заштампаваныя. А вось далей ідзе тая самая любімая намі «дзічына» ад Тыма Бэртана. Моцныя жаночыя ролі і непараўнальны той самы Майкл Кітан у ролі Бітджуса.
Сямейка Адамс (1991 г.)
Таксама класіка кіно на Гэлаўін. Ужо зусім не страшны фільм, але з прыгожаю эстэтыкаю. Лёгка можна глядзець з дзецьмі. Апісваць, пра што кіно, пэўна, ужо і не варта, бо сам выраз «сямейка Адамс» ужо стаўся даволі крылатым.
Смерць ёй да твару (1992 г.)
Неймаверныя Мэрыл Стрып, Гоўлдзі Гoн і малады (нават яшчэ з валасамі на галаве) Брус Ўіліс. Шыкоўны акторскі склад і небанальная гісторыя пра тое, як хочацца быць прыгожымі, маладымі і жыць вечна.
Субстанцыя (2024 г.)
Фільм, які выклікае неадназначныя рэакцыі. Хтосьці выходзіць з кінатэатраў, бо не вытрымлівае ажно столькі крыві і анатамічных падрабязнасцяў, хтосьці захапляецца Дэмі Мур і ейнаю смеласцю. Можна правесці паралелі з папярэднім фільмам «Смерць ёй да твару», тут таксама пра масавае жаданне затрымаць маладосць. Шматслойны фільм, які мы раім глядзець людзям толькі з моцнай псіхікаю.
Таямніца Коко (2017 г.)
Вельмі добры сямейны мультфільм, што распавядае пра жыццё пасля смерці і пра шанаванне продкаў, чаму мы мусім памятаць пра іх, калі яны паміраюць.
Душа (2020 г.)
Яшчэ адзін мультфільм студыі «Pixar», што распавядае пра тое, куды знікае нашая душа пасля смерці. Рыхтуйце сурвэткі.
Труп нявесты (2005 г.)
Тым Бэртан здымае не толькі фільмы, але і мульцікі. Нягледзячы на страшную назву, мультфільм вельмі добры і распавядае пра тое, як можна ахвяраваць уласным шчасцем дзеля іншага чалавека і чаго каштуе абяцанне.
Фокус-покус (1993 г.)
Тры вядзьмаркі любяць наводзіць жах на адзін маленькі гарадок у Масачусэтсе. Як з ім справіліся дзіцёнак і пара падлеткаў? І пры чым тут зомбі? Глядзіце ў кіно. Паверце, яно зусім не страшнае.
Фокус-покус-2 (2022 г.)
Сёстры-вядзьмаркі праз 23 гады пасля апошніх здзейсненых паскудстваў уваскрэслі. Фільм раскрывае таямніцу, адкуль узяліся тры фурыі, а таксама як парачка падлеткаў іх ізноў абвялі кругом пальца. І пры чым тут сяброўства, што дапамагае пераадолець нават самую моцную магію.
Аліса ў краіне цудаў (2010 г.)
І зноў любімы рэжысёр Тым Бэртан, гэтым разам яшчэ і ў кампаніі Джоні Дэпа ў ролі капялюшніка. Сюжэт вядомы, толькі Аліса ўжо не дзіцёнак. А вось выкананне вас дакладна ўразіць. Увага: частка жартаў будзе зразумелая хіба дарослым.
Аліса ў Зазяркаллі (2016 г.)
Працяг «Алісы ў краіне цудаў». Шмат казаць не будзем – паглядзіце.
Серыял «Працэсы» (2023)
У мінулым годзе выйшлі чатыры серыі серыялу «Белсату» «Працэсы». Гіпербалізаваная беларуская рэчаіснасць – дзесьці з гумарам, дзесьці даволі жахлівая. Мы не будзем раіць гэты серыял беларусам, бо яны і так усё разумеюць, а вось сябрам-замежнікам яго пакажыце, бо рэчаіснасць насамрэч жахлівая.
Першая серыя
Другая серыя
Трэцяя серыя
Чацвёртая серыя
Паляўнічыя за прывідамі (2 часткі, 1984 г. і 1989 г.)
Раім абедзьве. Назваць іх страшнымі не выпадае, усё ж у 80-х спецэфекты былі зусім іншыя. Але як сямейны фільм на Гэлаўін – чаму б і не. Ды і тэматычная музыка вядомая большасці добра.
Гары Потэр (2001–2011 гг.)
Калі ўжо казаць пра сусвет цудаў, магіі, то, канешне ж, варта перагледзець усе часткі сагі «Гары Потэр».
Эдвард рукі-нажніцы (1990 г.)
Магчыма, Тыму Бёртану варта даць званне самага актыўнага стваральніка фільмаў і мультфільмаў на Гэлаўін. Гэта гісторыя пра Эдварда, якога стварыў навуковец, але замест рук прымацаваў яму нажніцы. Нягледзячы на досыць страшнае апісанне, фільм – добрая казка для сямейнага прагляду.
Інтэрв’ю з вампірам (1994 г.)
Вельмі стылёвае кіно, калі можна так сказаць. Не без крыві (вампіры ўсё ж) ды і не для дзяцей хіба, але Том Круз, Брэд Піт, Антоньё Бандэрас гуляюць ну вельмі прыгожых вампіраў.
Практычная магія (1998 г.)
Дзве вельмі прыгожыя сястры-вядзьмаркі, якіх граюць Нікоўл Кідмэн і Сэндра Булак, наваражылі страшныя рэчы, а потым амаль увесь фільм спрабуюць іх выправіць. Фільм рэкамендуецца да сямейнага прагляду.
Бэтмэн вяртаецца (1992 г.)
Сага пра чалавека-кажана вялікая. Але фільм 1992 года сапраўды наводзіць жаху. Майкл Кітан у ролі Бэтмана і Дэні ДэВіта ў ролі чалавека-пінгвіна ствараюць сапраўдную атмасферу жаху, якая, як мы мяркуем, добра пасуе да прагляду на Гэлаўін.
Крампус (2015 г.)
Гэты фільм – пераход да навагодніх святаў. Стужка пра старадаўнюю істоту Крампуса, міфы і легенды пра якога распавядаюць дзецям. Вось толькі істота гэтая зусім не мілая і пагражае смерцю тым, хто не слухаецца. Мяркуем, што фільм пасуе хутчэй да Гэлаўіна, чым да навагодніх святаў.
Вольга Ярохіна belsat.eu
