Пра ўцёкі Грузіі ад дэмакратыі глядзіце ў спецрэпартажы «Грузія. Супрацьстаянне».
Партыя ўлады заяўляе: гэта выбары паміж мірам і вайною. Там упэўненыя – толькі «Грузінская мара» здольная не дапусціць пашырэння расейскай агрэсіі на Грузію, толькі яе прыхільнікі ведаюць, як «не злаваць Маскву».
Выбары ў кастрычніку – выбар паміж Еўропаю і Крамлём, упэўненыя апазіцыйныя сілы. Бо апошнія заканадаўчыя ініцыятывы і крокі «Грузінскай мары» ва ўнутранай палітыцы ўсё больш звязваюць каманду алігарха Бідзыны Іванішвілі з рэжымам Уладзіміра Пуціна і фактычна замарозілі працэс далучэння Грузіі да Еўрапейскага Звязу.
Іванішвілі з’явіўся на палітычнай сцэне пасля адстаўкі Саакашвілі ў 2011 годзе. Ён прыйшоў з буйнымі фінансамі і моцным інфармацыйным падтрыманнем Расеі. І стварае рух, а потым партыю «Грузінская мара».
,,«У 2011 годзе Іванішвілі пачаў выводзіць частку свайго бізнесу з Расеі. Расея яму дазволіла вывесці некалькі мільярдаў. Як вы самі разумееце, вывесці такія грошы без дазволу першых асобаў дзяржавы немагчыма», – каментуе былы міністр адукацыі (2009–2012) і былы міністр абароны (2012) Дзмітрый Шашкін.
Напярэдадні вызначальнага дня галасавання журналісты «Белсату» ўзяліся паглядзець, які шлях прайшла Грузія за больш як трыццаць гадоў незалежнасці.
- Як адна з найбагацейшых рэспублік СССР апынулася на мяжы выжывання?
- Як у краіне адбылася першая «каляровая рэвалюцыя»?
- У чым унікальнасць грузінскага шляху дэмакратычных трансфармацыяў і якія памылкі чакалі каманду маладых рэфарматараў?
- Раскажам пра расейскую агрэсію 2008 года, што сталася з прадвеснікам анексіі Крыму і вайны рэжыму Пуціна супраць Украіны.
- Як на фоне акупацыі Расеяй часткі грузінскай тэрыторыі да ўлады здолела прыйсці партыя, чыю палітыку называюць адкрыта прарасейскай?
- Як зменіцца Грузія пасля выбараў-2024?
