Еўрапейскі парламент 24 кастрычніка пастанавіў прысудзіць прэмію імя Андрэя Сахарава за свабоду думкі лідарам венесуэльскай апазіцыі: Марыі Карыне Мачада і Эдмунда Гансалесу Урут'ю.
«Гэтая прэмія сімвалізуе прызнанне Еўрапейскім парламентам Марыі Карыны Мачада як лідаркі дэмакратычных сілаў Венесуэлы і Эдмунда Гансалеса Урут'і як абранага прэзідэнта краіны, які рэпрэзентуе ўсіх тых венесуэльцаў унутры і за межамі краіны, хто змагаецца за аднаўленне свабоды і дэмакратыі», – гаворыцца ў паведамленні Еўрапарламенту.
Прэмія імя Сахарава за свабоду думкі ўручаецца Еўрапарламентам штогод. Яна была заснаваная ў 1988 годзе для ўзнагароджання асобаў і арганізацыяў, якія абараняюць правы чалавека, асноўныя свабоды і дэмакратыю. Яна названая ў гонар савецкага фізіка і палітычнага дысідэнта Андрэя Сахарава.
У 2004 годзе прэмію атрымала Беларуская асацыяцыя журналістаў, у 2006-м – адзіны кандыдат на прэзідэнцкіх выбарах Аляксандр Мілінкевіч, а ў 2020-м – дэмакратычная апазіцыя Беларусі.
28 ліпеня 2024 года ў Венесуэле прайшлі прэзідэнцкія выбары. Яны адбываліся ва ўмовах працяглага палітычнага і эканамічнага крызісу, цэнзуры і рэпрэсіяў. Дзейны кіраўнік дзяржавы Нікаляс Мадура ішоў на трэці тэрмін: абмежаванні ў два прэзідэнцкія тэрміны скасавалі па выніках «рэферэндуму» яшчэ ў 2009 годзе. Афіцыйна Мадура атрымаў перамогу, хоць паводле незалежных назіральнікаў пераможцамі былі прадстаўнікі апазіцыі.
Якуб Хруст belsat.eu
