Марыя Калеснікава амаль два гады знаходзіцца ў поўнай ізаляцыі. І таму зразумець, што яна думае адносна бягучай сітуацыі немагчыма. Пра гэта ў каментары «Вот Так» заявіла сястра палітзняволенай Таццяна Хоміч, каментуючы словы Аляксандра Лукашэнкі пра яе магчымае памілаванне.
Яна адзначыла, што сваякі апошні раз бачылі Марыю Калеснікаву ў снежні 2022 года. А апошнія звесткі ад яе паступілі ў лютым 2023-га. З таго часу год і восем месяцаў ад яе не было ніякай інфармацыі.
«Мы не можам ведаць, што зараз думае Маша, але я думаю, што яна можа разглядаць наогул розныя варыянты. Яны [улады. – рэд. Belsat.eu] маюць да яе доступ зараз, а не мы, і гэта прасцей даведацца. Але, вядома, трэба аднаўляць гэтую сувязь, вядома, каб, зноў жа, і родныя маглі з ёй пагаварыць і наогул зразумець, што яна думае, і ў якім яна зараз стане, бо мы да гэтага часу нічога не ведаем», – сказала Таццяна Хоміч.
Каментуючы заяву Аляксандра Лукашэнкі, сястра палітзняволенай заявіла, што, на яе думку, «Маша будзе гатова разглядаць розныя варыянты, гэта маё меркаванне, але, вядома, да гэтага ёй трэба, мусіць, разумець наогул, што адбываецца».
,,«Я спадзяюся, што ў яе такая магчымасць усё ж будзе, тое, пра што казаў сёння Лукашэнка, што такая магчымасць у яе з’явіцца», – дадала яна.
Што сказаў Лукашэнка
У інтэрв’ю журналісту ВВС Стывэну Розэнбэргу падчас саміту БРІКС у Казані Лукашэнка заявіў пра гатовасць разгледзець хадайніцтвы аб памілаванні Марыі Калеснікавай і іншых палітзняволеных.
«У нас ёсць закон: чалавек усвядоміў сваю віну, ён звярнуўся да прэзідэнта, як і шмат у якіх іншых краінах, з просьбай аб памілаванні, – ну што ж, мы разгледзім. Калі будзе такі зварот Калеснікавай, я абавязкова разгледжу», – сказаў кіраўнік Беларусі.
Лукашэнка запытаўся, чаму журналіст ВВС пацікавіўся менавіта пра Калеснікаву. Розэнбэрг патлумачыў: бо ў яе няма кантакту са сваёй сям’ёй.
«Якой сям’ёй? А дзе яе сям’я, вы хоць ведаеце? – запытаўся ў адказ Лукашэнка. – Вы нават не ведаеце, што за сям’я. Папрасіў бацька яе наведаць. Калі ласка, ідзі. Ён быў. Гэта сям’я? Хтосьці яшчэ хоча з родных, блізкіх наведаць яе, будзе просьба – мы яе разгледзім. <...> Нават калі вы звернецеся, мы вашую заяву разгледзім. Я кажу: разгледзім. „Так“, „не“ — гэта будзе відаць потым», – сказаў Лукашэнка.
Лукашэнка зазначыў, што ён супраць таго, каб вылучаць пэўныя асобы, бо «калі там сядзіць мільён, дык там усе людзі аднолькавыя.
«А Калеснікава і іншыя павінны адказаць перад гэтымі людзьмі, чаму яны там апынуліся. <...> Калі чалавек выправіўся, не парушае закон у папраўчай калоніі, калі нейкія паказанні па здароўі, мы абавязкова гэтых людзей, хутчэй за ўсё, памілуем. Ёсць камісія. Яна разгледзіць і прыме рашэнне», – сказаў Лукашэнка.
Палітзняволеная Марыя Калеснікава – сябра прэзідыуму Каардынацыйнай рады, кіраўніца выбарчага штабу Віктара Бабарыкі на прэзідэнцкіх выбарах 2020 года, была затрыманая 7 верасня 2020 года. Асуджаная на 11 гадоў пазбаўлення волі за заклікі да дзеянняў, скіраваных на прычыненне шкоды нацыянальнай бяспецы Рэспублікі Беларусь (арт. 361 КК РБ), змову з мэтай захопу ўлады неканстытуцыйным шляхам (арт. 357 КК), стварэнне экстрэмісцкага фармавання альбо ўдзел у ім (арт. 361-1 КК).
28 лістапада 2022 года Марыю даставілі з жаночай калоніі № 4 у хірургічнае аддзяленне гомельскай лякарні хуткай дапамогі і прааперавалі з прычыны прабадной язвы і перытаніту. З лютага 2023 года Марыя застаецца ў рэжыме інкамунікада, невядома, у якім яна дакладна цяпер стане, што адбываецца з ейным здароўем.
Якуб Хруст, Аляксандр Арлоў belsat.eu
