Абраная прэзідэнтка Беларусі Святлана Ціханоўская ў звароце наконт прызначэння даты прэзідэнцкіх выбараў расказала пра свае паўнамоцтвы ў 2025 годзе. Яна падкрэсліла, што працягне працу.
«У мяне ёсць абавязак перад грамадзянамі Беларусі – правесці сапраўдныя і сумленныя выбары. І сумленныя выбары патрэбныя не мне асабіста, яны патрэбныя Беларусі, каб выйсці з крызісу. Я не змагаюся за ўладу, я змагаюся за тое, каб беларусы вярнулі сабе права выбару, каб гаспадаром сваёй краіны быў народ, а не чалавек, які лічыць сябе гаспадаром краіны і народу», – заявіла Святлана Ціханоўская.
Яна адзначыла, што працягне сваю працу, бо праблема не ў ейных паўнамоцтвах, а ў тым, што «рэжым баіцца праводзіць сумленныя выбары, бо ведае, што зазнае паражэнне, як і ў 2020 годзе».
,,«Сумленныя выбары патрэбныя нашай краіне, і я павіншую чалавека, які будзе на іх абраны», – падкрэсліла палітык.
Каардынацыйная рада большасцю галасоў прыняла агульную стратэгію дзеянняў дэмакратычных сілаў Беларусі на выбарах. Яна была распрацаваная супольна з Офісам Ціханоўскай, Аб’яднаным пераходным кабінетам і Каардынацыйнай радай як «адказ недэмакратычным „бязвыбарам“ Лукашэнкі».
Дэмакратычныя сілы патрабуюць спынення ўсіх відаў рэпрэсіяў, вызвалення ўсіх палітзняволеных, рэалізацыі права ўсіх грамадзянаў Беларусі на паўнавартасны ўдзел у выбарах незалежна ад месца жыхарства, забеспячэння свабоды сходаў і роўнага доступу да медыяў і правядзення выбараў згодна з міжнароднымі стандартамі АБСЕ і пад кантролем назіральнікаў.
«Калі гэтыя патрабаванні не будуць выкананыя рэжымам, мы лічым тое, што адбудзецца ў 2025 годзе, імітацыяй выбарчага працэсу і прапануем выказаць свой пратэст шляхам галасавання супраць усіх, хто крадзе нашае права голасу», – заклікаюць дэмсілы.
Аўтары заявы абяцаюць прапанаваць іншыя варыянты выказвання пратэсту ў залежнасці ад развіцця сітуацыі.
Якуб Хруст belsat.eu
