23 кастрычніка два магутныя выбухі прагучалі каля будынку штаб-кватэры турэцкай вайскова-прамысловай кампаніі «Turkish Aerospace Industries» (TUSAŞ) недалёка ад Анкары, паведамляе агенцтва «Anadolu».
Паводле мясцовых медыяў, каля прадпрыемства адбылася страляніна. Міністэрства ўнутраных справаў заявіла, што гэта быў тэракт. У выніку выбуху ёсць параненыя і забітыя. Паводле папярэдніх звестак, маглі загінуць да 9 асобаў.
,,«Супраць турэцкай аэракасмічнай прамысловасці быў здзейснены тэрарыстычны напад. На жаль, у нас ёсць забітыя і параненыя», – напісаў міністр унутраных справаў Турцыі Алі Ерлікая на сваёй старонцы ў Х.
Нямецкі тэлеканал n-tv са спасылкай на турэцкія медыі паведамляе пра захоп закладнікаў, аднак у іншых крыніцах гэтая інфармацыя пакуль не пацвярджаецца.
Працаўнікі прадпрыемства схаваліся ў бункерах, мясцовасць вакол кампаніі ахопленая працаўнікамі службы бяспекі.
На прадпрыемстве «TUSAŞ» вырабляюцца знішчальнікі «Kaan», баявыя верталёты «T129 ATAK», беспілотнікі «Anka», касмічныя спадарожнікі, мадэрнізуюцца знішчальнікі F-16.
Марыя Міхалевіч belsat.eu
