Польшча закрывае генеральнае консульства РФ у Познані і прызнае супрацоўнікаў дыпламатычнага прадстаўніцтва непажаданымі на тэрыторыі краіны.
Такую заяву зрабіў міністр замежных справаў Польшчы Радослаў Сікорскі ў сваім акаўнце «Х».
,,«Расея вядзе гібрыдную вайну. Яна дапускае спробы перавароту на тэрыторыі Польшчы. Мой абавязак як міністра замежных справаў – рашуча рэагаваць. Першы крок – закрыццё расейскага консульства ў Познані. Мы не будзем адступаць. Мы абараняем Польшчу, мы абараняем палякаў», – напісаў кіраўнік польскага МЗС.
Пазней Сікорскі ўдакладніў, што «Расейская федэрацыя спрабавала здзейсніць акт дыверсіі на тэрыторыі рэспублікі. Паводле пракуратуры, яна павінна была быць ініцыяваная структурамі расейскай дзяржавы і кантралявацца імі». Таксама міністр дадаў, што валодае інфармацыяй аб тым, што гэтыя дзеянні не адзінкавыя і могуць паўтарыцца.
У панядзелак, 21 кастрычніка, Сікорскі заявіў, што затрыманы дыверсант, 51-гадовы грамадзянін Украіны Сяргей С., прызнаўся ў тым, што меў загад ад расейскіх спецслужбаў зрабіць падпал будынка лакафарбавага завода ва Уроцлаве.
Прэс-сакратарка расейскага МЗС Марыя Захарава адрэагавала на заяву Сікорскага і сказала, што рашэнне аб закрыцці генконсульства РФ у Познані з’яўляецца «чарговым варожым крокам, на які будзе дадзены балючы адказ».
Нагадаем, што акрамя Познані, генеральныя консульства Расейскай Федэрацыі ў Польшчы ёсць яшчэ ў Кракаве і Гданьску.
Раман Шавель belsat.eu
