Паводле інфармацыі «Парламенцкага каналу», еўрапалітыкі лічаць, што акно магчымасцяў для Беларусі «абавязкова будзе, але яно не будзе бясконцым, таму да яго трэба рыхтавацца ўжо цяпер». Што тычыцца дэмакратычных сілаў, то ў іх ужо «ёсць бачанне таго, як павінна выглядаць Канстытуцыя новай Беларусі».
«Пакет законапраектаў для новай Беларусі» ў снежні будзе прэзентаваны ў Еўрапарламенце падчас «беларускага тыдня» ў Бруселі, паведамляе «Парламенцкі канал» са спасылкай на дарадцу лідаркі дэмакратычных сілаў Святланы Ціханоўскай у справе парламенцкай супрацы і канстытуцыйнай рэформы Анатоля Лябедзьку.
Паведамляецца, што, сярод іншага, у гэты пакет увайшлі праекты законаў «Аб мясцовым самакіраванні», «Аб паліцыі», «Аб омбудсмане».
«Для нас гэта не толькі бачанне, якой павінна быць Беларусь, але і арганічная частка працы для еўраінтэграцыі Беларусі, – адзначыў Анатоль Лябедзька пасля сустрэчы з дэпутатам Еўрапарламенту ад Літвы, былым старшынёй літоўскага Канстытуцыйнага суда Дайнюсам Жалімасам. – Адзін з Капэнгагенскіх крытэрыяў – гэта адпаведнасць [законаў] краіны еўрапейскаму праву».
«Праект Канстытуцыі, законапраекты – гэта ваш ключ да дзвярэй будучыні», – падкрэсліў Жалімас.
Нагадаем, 15 сакавіка 2023 года з нагоды Дня Канстытуцыі Святлана Ціханоўская заявіла, што ў дэмакратычных сілаў ужо ёсць бачанне таго, як павінна выглядаць Канстытуцыя новай Беларусі. Праз год, 15 сакавіка 2024-га, пакет законапраектаў для будучай беларускай дзяржавы ўжо абмеркавалі ў Сейме Літвы на круглым стале «Інвестыцыі ў доўгатэрміновую будучыню дэмакратычнай Беларусі: ключавыя стратэгіі рэформаў». У той жа дзень Святлана Ціханоўская адзначыла, што дзеля таго каб прапановы зменаў у Канстытуцыю адпавядалі еўрапейскім стандартам, іх рыхтавалі разам з міжнароднымі партнёрамі з улікам самых сучасных дэмакратычных практык.
Лідарка дэмсілаў заклікала беларусаў далучыцца да абмеркавання Канстытуцыі на платформе «Новая Беларусь», а таксама дасылаць прапановы на электронную пошту або ў чат-бот.
Надзея Вольная belsat.eu
