Перапынак у палётах у Менск расейскага лоўкостэра будзе доўжыцца да канца сакавіка наступнага года. Пра тое, якія менавіта рэйсы адновяцца пасля гэтага тэрміну, не паведамляецца.
Апошні сёлета рэйс з Масквы ў Менск авіякампанія «Победа» здзейсніць 26 кастрычніка, а з Санкт-Пецярбургу ў Менск – 25 кастрычніка. У чым прычына прыпынення палётаў, невядома. Раней, дарэчы, паведамілі пра прыпыненне палётаў авіякампаніі «Белавія» з Менску ў Махачкалу.
У офісе «Победы» заявілі, што прыпыненне рэйсаў будзе часовым: маўляў, толькі на зімовы перыяд. І што палёты павінны аднавіцца ў канцы сакавіка 2025 года.
Цікава, што навіна пра прыпыненне палётаў з'явілася на фоне інфармацыі пра тое, што агулам колькасць пасажыраў на авіярэйсах паміж Беларуссю і Расеяй за 2021–2023 гады вырасла ў 2,5 разу.
Прытым толькі за восем месяцаў гэтага года – у 4,6 разу ў параўнанні з аналагічным перыядам 2021 года.
Авіякампанія «Победа», якая лічыцца нізкабюджэтнай у параўнанні з канкурэнтамі, упершыню запусціла рэйсы ў Беларусь у чэрвені 2022 года. Першы маршрут перавозніка звязаў Санкт-Пецярбург і Менск. У канцы кастрычніка таго ж года адбыўся запуск рэйсаў на маршруце Масква – Менск. У цяперашні момант з Менску ў Маскву і Санкт-Пецярбург можна даляцець на самалётах «Белавіі» і «Аэрофлота».
Надзея Вольная belsat.eu
